Холанѓанец со ампутирана нога преплива 18 километри од Охридското езеро

Добивај вести на Viber

Средовечен Холанѓанец, кој со својата сопруга често го посетува Охрид, сака да учестува на Охридскиот пливачки маратон откако со ампутирана нога исплива 18 километри од Охридското езеро, објави Гласот на Америка.

Корнелис Сгравема од Холандија, успеа да направи вистински подвиг, откако без една нога, каде има вградено вештачка протеза, преплива од „Свети Наум“ до хотелот „Гранит“ за пет часа и 15 минути, без поголеми проблеми.

Корнелис, на кого лани му била ампутирана десната нога, вели дека пливањето му претставува задоволство.

Вели дека Охридското Езеро е вистинскиот избор за лица со хендикеп.

„Зошто ме инспирира Охридското Езеро? Затоа што водата е многу свежа и чиста, и имате чувство дека сте жив. Водата е многу убава, и во не ане само што може да се плива, туку може и да се пие“, рече Корнелис.

Тој, за Гласот на Америка, откри дека негова желба е да настапи на 30 километри долгиот Охридски пливачки маратон, кој ќе се одржи на крајот на август.

„Она што ме мотивираше е убавата околина. Но, кога слушнав за маратонот се инспирирав уште повеќе, бидејќи сакам да им покажам на луѓето дека лицата со хендикеп можат да пливат исто како и останатите. Луѓето мислат дека не можам тоа да го направам, но, кога успеав се воодушевија. Најтешиот дел е да им покажеш на луѓето дека се е можно“, раскажува Корнелис.