Хонда и Нисан се спојуваат „за да преживеат“

Добивај вести на Viber

HONDA и Nissan се договорија да ја истражат можноста за спојување и формирање на заедничка холдинг компанија, објавија денеска компаниите. Овој потег ќе го создаде третиот по големина производител на автомобили во светот и ќе сигнализира огромна промена во индустријата.

Двете компании ќе имаат за цел комбинирана продажба од 30 трилиони јени (180 милијарди долари) и оперативен профит од повеќе од 3 трилиони јени во потенцијално спојување, се вели во соопштението.

Тие планираат да ги завршат преговорите до јуни 2025 година, а потоа да основаат холдинг компанија до август 2026 година, кога акциите на двете компании ќе бидат отстранети од берзата.

Консолидацијата ќе ја создаде третата по големина автомобилска групација во светот по продажба на возила, по Тојота и Фолксваген, во време кога „старите“ производители на автомобили се соочуваат со зголемени предизвици што ги поставуваат Tesla и кинеските производители на електрични возила.

Хонда, вториот по големина производител на автомобили во Јапонија по Тојота, има пазарна капитализација од повеќе од 40 милијарди долари, додека третопласираниот Нисан е проценет на околу 10 милијарди долари. Honda ќе го назначи мнозинството од менаџментот на холдингот, се вели во соопштението.

Интеграцијата на двете почитувани јапонски брендови ќе ја означи најголемата промена во глобалната автомобилска индустрија откако Fiat Chrysler Automobiles и PSA се споија во 2021 година за да го создадат Stellantis во зделка вредна 52 милијарди долари.

Комбинацијата со Mitsubishi Motors би ја зголемила глобалната продажба на јапонската групација на повеќе од 8 милиони автомобили. Во моментов третата по големина групација се јужнокорејските Hyundai и Kia.

Минатиот месец, Nissan објави план за укинување на 9.000 работни места и 20 отсто од својот глобален производствен капацитет, по падот на продажбата на клучните пазари во Кина и САД. Honda исто така објави заработка полоша од очекуваната поради падот на продажбата во Кина.