ХОРОР ВО КУМАНОВСКАТА БОЛНИЦА ПОСЛЕ ПОЛНОЌ - од зад грб покрил сестра со чаршав и ја бодел во вратот и рамото
Објавено во: Македонија 30 Септември, 2022
Полициски службеници од СВР Куманово го лишиле од слобода Ф.Ј. (38) од Куманово, затоа што со остар предмет нападнал и повредил медицинска сестра на Инфективното одделение во Општата болница Куманово, завчера после полноќ, соопшти МВР.
Насилникот бил задржан во полициска станица и по целосно документирање на случајот против него ќе следува соодветна пријава.
Инаку, како што говорат информациите од кумановската болница, медицинската сестра била нападната додека ги извршувала своите работни задачи во амбуланта, кога од зад грб и пришол напаѓачот и и ставил чаршаф на главата. Потоа почнал да ја дави и да ја удира. Таа паднала на подот, по што тој и ја затнал устата со рака за да не може да вика. Ги зел ножичките за сечење газа од бирото и ја прободел во левото рамо и по вратот, по што жената се онесвестила.
Откако сето ова го слушнале нејзините колешки и отишле да видат што се случува, ја нашле на подот со чаршафот на глава во бесознание. Откако ја освестиле веднаш повикале полиција и го алармирале обезбедувањето. Насилникот во меѓувреме побегнал.
Не е познато како тој влегол во зградата, бидејќи влезните врати на одделнијата се заклучуваат на полноќ, а пациентите кои доѓаат подоцна се најавуват на ѕвоно ако имаат потреба од лекарска помош. Се претпоставува дека можеби се криел во собите или во тоалетите, или влегол преку некој прозорец. Што точно се случувало ќе утврдат безбедносните камери во болницата.