Хрватска во ЕУ ќе го зголеми извозот на македоското вино

Добивај вести на Viber

Позитивен ефект од членството на Хрватска во ЕУ очекуваат македонските производители на вино. Извозот, посебно на вино во шише,  кое е доста популарно на овој традиционален пазар повеќе нема да биде ограничен. „До оваа година за вината од Македонија, Хрватска имаше свои квоти кои не беа доволни за наше позначајно присуство на тамошниот пазар. Извозот над овие квоти беше дополнително финансиски оптоварен што влијаеше на зголемување на крајната малопродажна цена на нашите вина, што нè правеше помалку конкурентни. Со влезот на Хрватска во ЕУ, добиваме можност за зголемување на извозот, бидејќи националните квоти се укинуваат, а ќе важат ЕУ - квотите кои се многу поголеми “ вели за Дојче Веле Марија Митева, директор на винаријата Сковин. Согласно договорот со ЦЕФТА од 2006 година, бесцаринската квота за извоз на вино во Хрватска изнесуваше 6,7 милиони литри. Овие квоти од 1 јули повеќе нема да важат за Хрватска, но барем засега нема ни да се додадат на оние што важат на ниво на ЕУ. Извозниците се надеваат дека наскоро и тоа ќе се промени. Од винарниците очекуваат проблем на почетокот да има само за наливното вино, поради фактот што со влегувањето на Хрватска во ЕУ бесцаринската квота останува иста. Хрватскиот пазар во последниве години станува се‘ позначаен за македонските винарии, кои по кризата полека се консолидираат и се позиционираат не само на традиционалниот европски пазар, туку и на далечниот исток. Но, сепак Европската Унија останува најзначаен партнер за македонското вино, посебно пазарите во Германија, Чешка и Словачка.