Им треба ли ветер во грб на жените од руралните средини за почнување на бизнис?

Добивај вести на Viber

Македонските жени кои живеат во руралните средини не се гледаат себеси во претприемачки води.

Ова го покажа истражување направено во Пелагонискиот регион. Анкетирани беа 350 испитаници, мажи и жени, во општините Новаци, Могила, Кривогаштани,  Крушево,  Битола,  Прилеп, Ресен, Демир Хисар и Долнени, во рамки на проектот „Од рурална жена до успешен претприемач, без стереотипи и дискриминација на местото истражување и анализа“. Во текот на анкетирањето жените кажале дека немаат време, финансиски средства, дека се дискриминирани во однос на мажот, отсечени се, и ред други фактори придонесуваат да не размислуваат за свој бизнис. 

„Во дополнителното истражување испитаничките  одговараа на неколку прашања со избор на скала од 1 до 5 каде 1 е  најниско  ниво, а имаа можност и да дадат  дополнителни коментари на истите. Поставените прашања  во просек беа околу 3-то ниво, како најслаби на скалата беа прашањата: Колкави се шансите да се остварите како претприемач? На скалата помеѓу 1 и 2 во просек. На кое ниво е развиена свеста за важноста на придонесот на жената, одговорија на скала помеѓу 2 и 3 во просек. Дали нивната идеја за воведување на новитети во земјоделието е слушната и вреднувана? Одговорија на скала до 3 во просек“, вели Билјана Ристевска, ангажирана за проектот.

Бројот на жени носители на земјоделско стопанство во Пелагонискиот регион се зголемува, но уште е далеку зад оној на машки носители.

Светлана Петковска од Организација на жени Битола вели дека во рурланите општини Новаци и Могила, жените не се заинтересирани за отворање на свој бизнис.

„Во текот на минатата година направив анкета во 31 село во Општина Новаци, лично појдов таму, и навистина едукација е потребна, но интересот за почнување сопствен бизнис е многу слаб. Слична е состојбата и во Општина Могила. На жените од овие средини им е полесно да работат за плата во Битола, отколку да почнат свој бизнис“, изјави таа.

Додава дека жените во овие средини биле едуцирани како можат да почнат свој бизнис, но таму владее апатија, и жените првенствено мислат дека парите се пресудни за да покренат бизнис.