„ИМАВ ОДЛИЧЕН ОДНОС СО ПУТИН, НО СЕГА СУМ МНОГУ РАЗОЧАРАН“: Трамп за односите со рускиот претседател, но и за интервенцијата во Чикаго

Добивај вести на Viber

Претседателот на САД, Доналд Трамп изјави дека рускиот претседател Владимир Путин го разочарал, а шпекулациите за неговото лошо здравје ги отфрли како „лажни вести“.

Во интервју за радио емисијата „The Scott Jennings Radio Show“, Трамп рече дека е „многу разочаран“ од рускиот претседател Владимир Путин и додаде, без да даде детали, дека неговата администрација планира да преземе некои мерки за намалување на бројот на смртни случаи во Украина.

Трамп разговараше со Путин во Алјаска кон средината на август, а потоа се сретна со украинскиот претседател Володимир Зеленски и клучните европски сојузници во Белата куќа.

По тие состаноци, Трамп рече дека очекува Зеленски и Путин да се сретнат пред трилатералниот самит на кој ќе учествува и Трамп. Зеленски рече дека Русија прави сè што може за да спречи средба меѓу него и Путин, додека Русија рече дека агендата за таков состанок не е подготвена.

„Воопшто не сум загрижен за руско-кинескиот сојуз“

Трамп, исто така, во интервјуто рече дека не е загрижен за потенцијален сојуз меѓу Русија и Кина, кратко откако Владимир Путин и Си Џинпинг се сретнаа во Пекинг.

„Воопшто не сум загрижен за тоа. Имаме убедливо најмоќната војска во светот и тие никогаш не би ја употребиле својата воена моќ против нас. Верувајте ми, тоа би било најлошото нешто што би можеле да го направат“, додаде тој.

„Никогаш не сум се чувствувал подобро“

Трамп ги отфрли извештаите на социјалните медиуми за неговата лоша здравствена состојба. Тој ги нарече „лажни вести“ и рече дека бил многу активен во текот на викендот.

Неговите коментари следеа по гласините на интернет дека неговото здравје се влошува, па дури и дека починал, кои почнаа да кружат откако тој не се појави пред медиумите неколку дена. Тие беа дополнително поттикнати од изјавата на потпретседателот Џ.Д. Венс дека е подготвен да ја преземе функцијата ако „му се случи некоја трагедија“ на Трамп.

„Не сум ги видел тие гласини. Тоа се лаги“, рече тој кога новинарите го прашаа за неговото здравје. „Никогаш не сум се чувствувал подобро“, заклучи тој.

„Ќе има федерална интервенција во Чикаго“

Американскиот претседател Доналд Трамп му рече на конзервативен радио водител во вторникот дека ќе има федерална интервенција во Чикаго, но одби да каже кога.

„Не сакам да кажам кога, но ќе се случи. Ќе има и на друго место“, рече Трамп кога беше прашан во „Радио шоуто на Скот Џенингс“ дали неговата администрација ќе ја испрати Националната гарда во Чикаго.

Трамп ја испрати Националната гарда во Вашингтон пред три недели и ја стави полициската управа таму под директна федерална контрола, тврдејќи дека главниот град на САД е „преплавен со насилни банди, злобни криминалци, наркомани и бездомници“.

Во таа пригода тој изјави дека „постојат и други градови кои се лоши“ и ги наведе Чикаго, Лос Анџелес, Њујорк, Балтимор и Оукленд. Сите тие се водени од демократи. Градоначалникот на Чикаго, Брендон Џонсон, во тоа време рече дека испраќањето на Националната гарда „само ќе го дестабилизира градот и ќе ги поткопа напорите за јавна безбедност“.