Индустриското производство непрекинато паѓа, металната индустрија најпогодена

Добивај вести на Viber

Намалената побарувачка од странство, високите цени на енергенсите, зголемувањето на цените на репроматеријалите и тешкиот пристап до пари се проблемите со кои се уште се соочуваат домашните компании, а тоа го потврдува и податокот за индустриското производство кое константно паѓа од почетокот на годинава, при што само во октомври се забележува пад од 4,6% во споредба со истиот месец лани. Најголем е ударот врз рударската и врз металната индустрија, каде што производството во октомври е намалено за 13,7% и за 7,5%. Дел од компаниите веќе не се оптимисти за до крајот на годината ниту пак предвидуваат подобрување за почетокот на идната. Металната индустрија најпогодена Статистиката покажува дека од преработувачката индустрија најголем пад има во производството на метали, 7,5% во октомври во споредба со истиот месец лани. Производство на прехранбените производи пак е намалено за 1,4%. Раст на производството се забележува единствено кај пијалаците за 42,3%, текстилот 15,9% и облеката за 30,6%. „Очигледно е дека долгорочни прогнози за производството и да сакаме, не можеме да дадеме затоа што ситуацијата е толку неизвесна што само едно е сигурно а тоа е дека на кратки стази нема да има промени ниту пак подобрување на состојбите. Годинава ќе ја завршиме како и досега што работевме, со намалено производство, редуциран број на вработени и сл. Според нашите пресметки нема да има промени ниту во првиот квартал од идната година, но тогаш веројатно ќе имаме пореални информации да ни кажат како и што да планираме“, вели Александар Панов, генерален директор на Макстил. Секторски гледано во октомври производството потфрлило и во рударство и вадење камен за 13,7%, снабдување со енергија пад од 26,8% и преработувачка индустрија опаѓање од  1%. „Ние успеавме некако годинава да не го намалиме производството и да не отпуштаме работници. Што се однесува до идната, во зависност од состојбите, планираме да ја одржиме истата ситуација со истиот обем на производство како годинава“, вели Максим Прохоров од Саса. Споредено со првите десет месеци од годинава во споредба со истиот период лани, падот на индустриското производство изнесува 6,7%. Во истиот период, според главните индустриски групи, производството најмногу опаднало кај енергија за 20,8% и трајни производи за широка потрошувачка за 36.4% Соња Јованова Наумовска