Иран и „Шесторката“ со интензивни преговори
Објавено во: Свет 31 Март, 2015
Претставници на Иран и постојаните членки на Советот за безбедност на ОН, како и Германија, се очекува денес да склучат рамковен договор по речиси една и пол година на интензивните преговори за нуклеарната програма на Техеран, објави „Франс прес“.
Министрите за надворешни работи на Иран, САД, Велика Британија, Кина, Франција, Русија и Германија се надеваат дека ќе направат работна рамка за нуклеарниот договор за време на денешните преговори во Лозана, кои веќе почнаа. Крајниот рок истекува на полноќ.
Сеуште има тешки прашања ... Се обидуваме многу напорно да ги надминеме, рече државниот секретар на САД Џон Кери, кој е во Лозана од средата.
Кери се сретна денеска со своите колеги од Франција, Велика Британија, Кина и Германија. Иранскиот министер за надворешни работи ќе се приклучи подоцна кон своите колеги од САД, Франција, Велика Британија, Германија и Кина. Рускиот министер за надворешни работи Сергеј Лавров ги напушти разговорите вчера и ќе се врати само ако има „реални“ шанси за договор, изјавил портпаролот на рускиот дипломат.
Изворот посочил дека состанокот траел цела ноќ во Лозана но билатералните консултации со Иран не доведоа до договор. Главните нерешени прашања се поврзани со прашањето за укинување на санкциите против Иран, рокот за замрзнување на нуклеарната програма, и бројот на центрифугите за збогатен ураниум.
„Нема да има договор, ако прашањето со санкциите не се реши“, изјавил ирански нуклеарен преговарач.
Конечната форма и содржина на договорот треба да бидат усогласени меѓу преговарачките страни до 30 јуни. Земјите сеуште имаат големи несогласувања во техничките аспекти на договорот кои треба да бидат расчистени до крајот на јуни.