ИСИЛ нареди полово осакатување на милиони девојчиња и жени!

Добивај вести на Viber

Радикалната Исламска држава што контролира голем дел од територијата на Ирак и Сирија нареди полово да бидат осакатени сите девојчиња и жени на возраст меѓу 11 и 46 години. „Исламската држава објави фетва, тукушто сме известени“, изјави претставничката на Обединетите нации во Ирак Жаклин Бедкок. Таа не може да прецизира за колку точно жени и девојчиња ќе важи мерката, но врз основа на податоците на Обединетите нации проценува дека ќе бидат погодени најмалку четири милиони. Половото осакатување во Ирак досега не се практикуваше , освен во некои изолирани подрачја. На удар во областите под контрола на екстремистите се и дваесетина христијански семејства во Мосул, кои преживуваат само благодарение на помошта од невладини хуманитарни организации. Некои од нив веќе го прифатиле исламот, а други се одлучиле да плаќаат парична глоба што им ја наметнува Исламската држава. Екстремната радикална сунитска група потекнува од терористичката мрежа Ал Каеда и делува во Сирија и Ирак, а од 9 јуни започна голема офанзива на ирачка територија, освојувајќи градови и региони и напредувајќи кон главнот град Багдад. Лидерот Абу Бакр ал-Багдади, кого следбениците го прогласија за калиф, ги повика муслиманите на послушност. Половото осакатување на жените е постапка на делумно или целосно отстранување на надворешните женски гениталии или друго повредување на женските полови органи кое се прави од немедицински причини. Постапката нема никаква здравствена корист и се извршува само од верски, традиционални уверувања дека жената не треба да ужива во сексот или други предрасуди. Освен опасност од инфекција тоа носи и други долгорочни опасности за физичкото, психичкото и сексуалното здравје. Праксата е проширена во 28 африкански земји и во делови од Блискиот Исток и Азија. Во 2013 година, Светската здравствена организација објави дека 140 милиони жени во светот се полово осакатени, а секоја година таква судбина им се заканува на три милиони нови.