Искршени повеќе казина во Струмица, кривични пријави за поголема група

Добивај вести на Viber

Уништувањето на казина во Струмица не е поединечен акт на само еден човек, а освен случајот со демолирање на казиното „Сенатор“ пред речиси еден месец, слично дивеење и кршење на апаратите за игри на среќа имало и во казината „Слот“ и „Адмирал“ од страна на лица кои биле поттикнати од првиот напаѓач.

Струмичката полиција поднесе кривични пријави како против лицето кое го демолирае казиното „Сенатор“, така и уште против две други лица. Според полицијата 49 годишниот жител од Василево откако со копач  удирал по апаратите   во „Сенатор“ недела  подоцна ги  натерал  пријателите  да ги  уништуваат  апаратите и во казиното „Слот“.

„Имено,  второпријавениот, Д.Г. поттикнат од А.В. заминал во станот во кој живеел и зел  метална тесла со дрвена рачка и заедно со трето пријавениот В.Ѓ. околу 09.35 часот, влегле во казино „Слот“ во Струмица,  по што заедно, Д.Г. со метална тесла, а Д.Ѓ со камен извршиле оштетување на вкупно 20  апарати (машини), со што направиле  вкупна материјална штета од 1.268.185 денари“, изјави Хризантема Рендевска портпарол на СВР Струмица.

Инаку  во „Сенатор“ според полицијата  осомничениот жител од Василево  уништил  44 слот апарати и два рулета  при што  направил штета во висина од 2 милиони и 600 илјади денари.

Од полицијата не конкретизираа кои биле мотивите за неговото дивеење во ова казино  но се претпоставува дека било резултат на изгубени пари на апаратите за игра на среќа.