Израел: Војникот по кој се трагаше загинал, не е киднапиран

Добивај вести на Viber

Израелската војска соопшти дека војникот, кој исчезнал во Појасот Газа, а за кого се веруваше дека го киднапирале припадници на Хамас, всушност загинал во борбите тој ден. Исчезнувањето на израелскиот војник Хадар Голдин, за кој се веруваше дека го држат припадници на палестинското радикално движење, всушност беше причина за нови уште пожестоки напади на Израел врз Газа. Припадниците на Хамас инаку негираа дека го киднапирале 23-годишниот војник и го држат во заробеништво. Тој инцидент предизвика неуспех на планираното тридневно израелско-палестинско примирје по само неколку часа откако беше воведено. Израелската војска сега со ДНК анализа утврдила дека војникот загинал, иако неговото тело не е пронајдено. Израелскиот министер за одбрана Моше Јаалон се сретна со семејството на војникот за да им изрази сочувство. Со смртта на Голдин бројот на загинати во конфликтот на израелска страна се искачи на 67, од кои 63 се војници. Тоа е најголем број жртви за Израелците од војната со Либан во 2006 година. Во Газа, пак, загинаа околу 1.700 Палестинци, од кои најголемиот број се цивили. Израелската војска и утрово ја продолжи офанзивата во Газа, првенствено со воздушни напади, откако синоќа започна да се повлекува дел од копнената израелска војска. Во телевизиско обраќање доцна синоќа израелскиот премиер Бенјамин Нетанјаху навести дека војската ќе ја преиспита ситуацијата по уништувањето на тунелите кои Хамас ги користел за влез на израелска територија под границата. Сепак, во исто време, Нетанјаху го предупреди Хамас дека ќе плати „неподнослива цена“, ако продолжи да дејствува со ракети кон израелска територија и дека сите опции се во оптек.