„Не само Груевски, кој на очиглед на целата јавност и сите институции побегна, туку и Јанакиески и Божиновски планирале бегство на ист начин. СЈО бараше притвор уште кога го поднесе обвинението, истакнувајќи дека постои опасност од бегство. Но, судот тогаш одлучи на обвинетите да им определи поблаги мерки. Во обвинението за изборните нерегуларности не постои дејствие кое е извршено, а да не е обвинет Никола Груевски. Сите докази се докази во целина и не е целисходно да се раздвои постапката. Затоа бараме на Груевски да му се суди во отсуство“, рече обвинителката Стефанова.
Дополни дека ќе се бара иста мерка за сите останати за кои има сознанија дека планираат да побегнат од спроведувањето на правдата на ист начин како и Груевски. За осудениот бегалец Стефанова побара од судот да му се суди во отсуство, оти, како што рече, постапката не може да биде раздвоена, бидејќи Груевски е организаторот на целата криминална група.
