Јохан Ејсел: Македонија сама по себе е бренд, но не е доволно промовирана!

Добивај вести на Viber

Според американскиот професор Јохан Ејсел, во Македонија треба да се посвети посебно внимание на брендирањето на макро и на микро план, бидејќи многумина во САД не знаат за потенцијалите на државата, за понудата и македонските производи кои по многу нешта се оригинални.

„Македонија сама по себе е бренд, но не е доволно промовирана во САД и тоа треба да го направите за да уште повеќе се знае и дознае за Македонија. Ние ќе се обидеме да помогнеме во тоа за што вршиме истражувања кои ќе ги презентираме со нашите студенти во текот на претстојното лето кога повторно ќе дојдеме во Македонија, посочи професорот Јохан Ејсел од универзитетот Питсбург пред студентите во Битола за време на трибина за улогата на маркетингот и промоцијата во брендирањето.

На трибината учествуваа студенти од БАС, претставници на граѓанскиот и бизнис секторот чиј интерес се вложувањата во маркетингот и промотивните активности.

„За да се одржи чекор со времето и со научно-техничкиот развој, но и да се обезбеди соодветна конкурентна позиција на меѓународниот пазар, важно е местото на маркетингот, кој во компаниите ги идентификува потребите на потенцијалните клиенти и го оформува спектарот за перспективноста на успехот во нивното работење“, истакна Тони Соклевски, раководител на БАС.

Со воспоставувањето на соработката меѓу БАС и БАС Институт за менаџмент и професорот Јохан Ејсел од Универзитетот Питсбург во Пенсилванија,  од двете држави ќе разменуваат искуства и ќе нудат решенија за брендирање во различни области.