Јубилеј-50 години Универзална сала Скопје

Добивај вести на Viber

По катастрофалниот земјотрес во Скопје, во јануари пред 50 години беше пуштена во употреба Универзална сала Скопје. Изградена како резултат на светската солидарност и помош, брзо стана центар на сите културни случувања во градот. Златно Славејче, Скопски џез фестивал, Буба Мара, Скопски фестивал, концерти, претстави, промоции, со учество на реномирани домашни и интернационални гости, илјадници настани се случија на овој простор, ширејќи добра енергија.

Врвна музика, забава и смеа, негување на традицијата и културата се работи кои се поврзуваат со Универзална сала, чија сцена e престижно место за настапување и начин да се стекне популарност. Речиси и да нема уметник, музичар кој не настапувал на оваа сцена, кој тука ги добил првите аплаузи, ги пуштил првите солзи...кој едноставно не уживал во овој простор. По повод јубилејот 50 години од постоењето нашата редакција разговараше со нашата Поп дива Каролина Гочева која и многупати била дел од активностите во Универзална сала, придонесувајќи со своите настапи кон незаборавни музички моменти.

“Многу концерти и манифестации ме врзуваат за Универзална сала. Една од нив е Скопје- фест. Тоа е периодот кога со моите 13години дeбатирав на сцената на Универзална сала со песната Кој да ти каже. Иако сум Битолчанка Универзална некако ми е во срцето токму поради тојот прв професионален настап, а потоа и концертите кои следеа .

Ги паметам тие моменти тоа беше голема возбуда за мене. Јас пеев рамо до рамо со искусни пејачи, а ја освоив третата награда од публиката. Се уште многу добро се сеќавам на моментот пред да излезам на сцената, колку бев возбудена. И тогаш, па и понатаму низ годините, оваа сала се карактеризираше со нешто посебно. Атмосферата е фантастична, секогаш исполнета со најдобрата публика, која воопшто не е пасивна, туку пее со тебе. Всушност тремата трае додека излезеш на сцена, потоа се друго е хармонија на убава енергија, забава и добра музика. Те понесува атмосферата и уживаш. Секогаш со задоволство настапував во Универзална сцена, а многу често бев и гостин, на многу други настани, концерти, кои овде постојано ги имаше. Зиме, лете..секогаш исполнета...со луѓе со стил, кои ја сакаат културата, музиката и секогаш ведри и расположени за добра забава. А добра забава отсекогаш имало во универзална сала...на сцената, во публика, во ходниците..пред и по настани...

Би сакала да го честитам јубилејот 50 години од постоењето на Универзална сала Скопје, и да посакам многу брзо добрата музика и енергија повторно да ја имаме. Да уживаме и да се собираме на ова место и понатаму, кое се надевам ќе биде уште поубаво, и понатаму ќе биде духовен центар на скопјани, и културно обележје на градот Скопје и Македонија, кои се надеваме во блиска иднина ќе бидат наградени со признанието европски град на културата” ни пренесе Каролина.

Универзална сала не е обичен објект во Скопје. Израснавме одејќи во Универзална сала, живеевме со неа. Таа е историја, срцето на сите културно уметнички случувања во градот, место за забава, смеа, место со кое скопјани се емотивно поврзани. Малечка, и можеби со многу недостатоци, таа сепак е омилено сврталиште на сите оние кои години наназад ја сакаа музиката, традицијата, уметноста.

Едноставно и несомнено културен симбол за Скопје! Од пред една година регистрирана како конгресен центар Александар Македонски, ова култно место и понатаму ќе обединува, и од тука ќе се испраќаат позитивни пораки и ќе се црпат инспирации за нови достигнувања. Нека е честит јубилејот 50 години, и да посакаме и понатаму да биде во срцето на скопјани, изјави Директорката на конгресниот центар Александар Македонски госпоѓата Вера Бошковска.