Како големите македонски банки ги прават големите пари?

Добивај вести на Viber

„Стопанска банка Скопје“, „Комерцијална банка“ и НЛБ Банка Скопје за орочени влогови и депозити платиле камати во износ од 36,75 милиони евра, а откако значаен дел од тие орочени влогови и депозити ги пласирале како кредити и заеми од каматите заработиле 186,9 милиони евра! Нето разликата создадена од тоа што наплатиле и тоа што платиле е 150 милиони евра!!!

Трите најголеми деловни банки во земјава: „Стопанска банка Скопје“, „Комерцијална банка“ и НЛБ Банка Скопје лани заедно оствариле нето приходи од камати во износ од 150 милиони евра! Ова е приход што банките го прават, наједноставно речено, како разлика од каматите што банките ги наплатуваат за кредитите што ги пласираат на фирми и граѓани и каматите што банките ги плаќаат за депозитите на граѓаните и фирмите чии пари ги чуваат.

Пресметката покажува дека трите најголеми банки на крајот на 2016 година заедно имале депозити од граѓани и фирми во вкупен износ до 3,461 милијарди евра и за камати на тие пари на граѓаните и на фирмите им платиле 36,75 милиони евра. Тоа е 1,06 отсто од износот што го добиле на чување!

Значаен дел од парите што ги чуваат како депозити и орочени заштеди банките ги пласираат на кредитниот пазар во форма на кредити и заеми на клиенти. Лани трите најголеми банки пласирале во кредити вкупно 2,454 милијарди евра. На тие пласмани банките наплатиле камати во износ од 186,9 милиони евра. Наплатените камати се 7,6 отсто од пласираните кредитни средства!

На овој начин се јавува нето разлика во корист на банките која се вика нето приходи од камати и за лани изнесува 150 милиони евра за трите банки. Најголем дел од овие нето приходи од камати се главниот агенс што ги билда нето добивките на трите најголеми банки.

Стопанска банка Скопје

Оваа банка, најголема според капиталот на нашиот банкарски пазар, лани имала депозити и орочени штедни влогови во висина од 1,107 милијарди евра и за нив на сопствениците на тие пари платила камати во вкупен износ од 14,4 милиони евра. Трошокот на банката за добивањето на овие пари е 1,3 отсто од нивниот износ. Истовремено банката лани имала кредитни пласмани во износ од 973,2 милиони евра од кои наплатила камати во вкупен износ од 70,5 милиони евра. Тоа е 7,2 отсто на пласираните средства. Соодносот меѓу приходот од камати и трошокот за камата е 56,1 милиони евра во корист на банката.

Комерцијална банка

Најголемата домашно поседувана банка и банка со најголема депозитна база. Лани имала депозити и заштеди во износ од 1,413 милијарди евра. На нив платила 9,05 милиони евра за камати. Тоа е трошок од 0,64 отсто од вредноста на депозитната база. Наспроти тоа оваа банка пласирала 733,7 милиони евра во кредити. На тие пари лани наплатила камати во износ од 58,9 милиони евра. Тоа е 8 отсто од пласираните средства и има подобар коефициент во однос на „Стопанска банка Скопје“. Соодносот меѓу приходите од камати и расходот за камата е 49,85 милиони евра во корист на банката.

НЛБ Банка Скопје

Третата најголема банка лани по кредитни пласмани ја надмина „Комерцијална банка“. Нејзината депозитна база на крај на 2016 година изнесува 941,4 милиони евра и на тоа платила односно имала трошок кон споствениците на парите во износ од 13,3 милиони евра. Трошокот е 1,4 отсто од висината на депозитната база. Споредено со другите две најголеми банки НЛБ Банка Скопје има најголем трошок за депозитната база. Оваа банка лани пласирала 747 милиони евра кредити и од тоа наплатила 57,5 милиони евра камати. Приходот од камати е 7,7 отсто од пласираните средства. По тоа е помеѓу „Комерцијална банка“ која има највисок приход во однос на пласирани кредити и „Стопанска банка Скопје“ која е за нијанса послаба од НЛБ Банка Скопје. Нето резултатот меѓу приходите од и расходите за камати е 44,2 милиони евра во корист на НЛБ Банка Скопје.