КАКО ИМ УСПЕА ДА УКРАДАТ 1,7 МИЛИЈАРДИ ДОЛАРИ ВО КРИПТОВАЛУТИ: Лидери се, во светот им нема рамен
Објавено во: Економија 04 Февруари, 2023
Северна Кореја,
која важи за технолошки неразвиена земја, е лидер во кражбата на криптовалути
на глобално ниво.
Имено, нејзините хакери минатата година украле дигитални пари во вредност од 1,7 милијарди долари, велат од компанијата Chainalysis која се занимава со анализа на блокчејн пазарот. Ова е четири пати повеќе од сумата што успеале да ја земат во 2021 година.
Колку е сериозна оваа бројка покажува фактот дека на севернокорејските хакери им се припишува речиси половина од вредноста на украдените криптовалути на целата планета. Минатата година, се разбира, со нелегални методи беа украдени вкупно 3,8 милијарди долари дигитални пари. Ова е за половина милијарда долари повеќе отколку што беше украдено во 2021 година.
Добар дел од таа сума помина низ рацете, односно тастатурите на севернокорејските хакери. Се сомнева дека тие се поддржани од државата и дека дел од овие пари ќе бидат наменети за продолжување на финансирањето на развојот на нуклеарно оружје. Уште повеќе, американските безбедносни службеници веќе пресметале дека една третина од тие пари ќе завршат во програмата за развој на оружје.
Исто така, се додава во овој извештај, постојат сериозни индиции дека Северна Кореја е вмешана во „перење“ на дигитални пари и NFT украдени од други хакери, како и дека е вмешана во некои акции на групата „Лазар“, која крадела криптовалути во голем обем.
ФОТО: EPA-EFE/JEROME FAVRE