Какво ВМРО-ДПМНЕ посакува Никола Груевски во иднина?

Добивај вести на Viber

Eкс премиерот Никола Груевски вели дека не ги знае аргументите и доказите за разрешувањето во редовите на партијата со која тој долги години раководеше. 

Груевски рече дека посакува силна и обединета партија.

Груевски на пауза од рочиштето за случајот „Титаник” изјави дека нема да ги коментира случувањата во партијата. 

„Не ги знам сите аргументи и докази со кои располага раководството на ВМРО-ДПМНЕ и врз основа на кои ги темели своите одлуки. Ќе се воздржам од коментари затоа што можам да погрешам во една или друга насока. Посакувам силно и обединето ВМРО-ДПМНЕ кое брзо ќе го урне ова зло кое го има Македонија. Се покажа и се покажувало во минатото секогаш кога ВМРО-ДПМНЕ е силно, силна е и Македонија. Убеден сум дека и граѓаните го посакуваат тоа“, изјави Груевски. 

Откако дел од пратениците на ВМРО-ДПМНЕ решија да гласаат „За“ почеток на уставните измени, партијата ги исклучи. 

Исклучени беа прво Крсто Мукоски, Сашо Василевски, Љубен Арнаудов, Елизабета Канческа-Милевска, Зеќир Рамчиловиќ, Нола Исмајлоска - Старова и Емилија Александрова, а на Централниот комитет препорака за исклучување е дадена за Сашо Мијалков, Никола Тодоров, Митко Јанчев е разрешен од партиските функции, и други лица. 

Адвокатите на Груевски потврдија дека во понеделникот ја добиле извршната пресуда, а сега чекаат да биде формиран упатниот акт на кој ќе биде означен датумот, часот и затворот каде Груевски ќе треба да се јави. Деновиве ТВ 21 објави дека тој ќе треба да замине во кумановскиот затвор, објект кој лично тој го пушти во употреба.