Карантински викенд за кумановци

Добивај вести на Viber

Кумановци од денеска ќе бидат во целосен карантин. Таква одлука донесе синоќа Владата, откако бројот на заразени со новиот коронавирус почна забрзано да се зголемува во овој град. Воведен е полициски час, кој стапи на сила од синоќа во 21 часот и и трае до понеделник до 05 часот изутрина. Во текот на работните денови, пак, полицискиот час за кумановци ќе почнува од 16 часот попладне, што значи дека граѓаните ќе може да се движат само од 5 часот изутрина до 16 часот попладне.

Според последните информации во општата болница во Куманово има 11 нови регистрирани пациенти заразени со Ковид-19, што сериозно ја нарушува работата на Инфективното одделение, каде и претходно имаше регистрирани пациенти. 

Министерот за здравство Венко Филипче информира дека во текот на наредните денови, еден доктор од Скопје и еден од Штип ќе бидат преместени во Куманово на инфективното одделение

-Со оглед на тоа што се очекуваат резултатите од тестовите и на други лекари и технички персонал, ќе се реорганизира работата и во другите одделенија на болницата, изјави министерот Филипче.
Инаку, од вкупно 46-те новозаразени пациенти во деноноќието четврток спрема петок, 23 се од Куманово. Моментално, на Инфективната клиника во Скопје се наоѓаат 67 пациенти, од кои 10 имаат тешка клиничка слика, информираат здравствените власти, соопштувајќи дека вкупната бројка на инфицирани сега е 430. 

Веднаш по објавата на информацијата кумановци побрзаа да купат се што им треба, па создадоа редици во маркетите.

Градоначалникот Максим Димитриевски рече дека граѓаните ќе имаат помош.