Карпош размислува за зголемување на партиципацијата во градинките, храната е многу поскапена

Добивај вести на Viber

Општина Карпош размислува за зголемување на партиципацијата што родителите ја плаќаат за децата во градинките, затоа што добавките на храна и хигиенските трошоци се поскапени.

Ова го соопшти општината по средбата на градоначалникот Стевчо Јакимовски со директорките на градинките.

Средбата се одржала на барање на директорките, а посебен акцент бил ставен на притисокот од страна на добавувачите за пораст на цените на прехранбените и хигиенските производи кои се користат при секојдневното згрижување на децата. 

„На ова се надоврзува и зголемените трошоци на електрична енергија и парно со што финансиската состојба со предучилишните установи ја прави неодржлива. Раководствата на овие установи се соочуваат со секојдневни најави за раскинување на договори за снабдување со храна и други материјали потребни за извршување на дејноста. Директорките истакнаа дека сето ова се одразува негативно на квалитетот на услугите во згрижувањето на децата, на функционирањето на техниката и опремата како и на тековното и инвестиционото одржување“, соопшти локалната самоуправа.

Заеднички став е дека или владата мора да ги зголеми блок дотациите или треба да се зголеми партиципацијата за згрижување на децата во градинките која изнесува 1490 денари за еден месец, а е непроменета од 2002 година.