Катастарот си ја заврши работа, покриена е цела Македонија

Добивај вести на Viber

Република Македонија воспостави целосен катастар на недвижности, откако вчера беше потпиша последното решение со што катастар на недвижности доби и селото Драчево. „Постапката за воспоставување катастар на недвижности во земјава е почната во 1986 година со донесување закон. Во 1988 година првпат е стапена на сила една катастарска општина во кривопаланечкиот регион и до 2005 година изнесува околу 40 проценти од целата територија, а сега веќе го заокружуваме со воспоставување на катастарот на недвижности, рече директорот на Агенцијата за катастар на недвижности Славче Трпески. Тој додаде дека со воспоставување на катастарот на недвижности паралелно може да се види голем тренд на пораст на предметите. Така, во 2007 година имало 389.000 примени предмети од кои 8.300 нерешени предмети, а во 2011 година го достигнува рекордот примајќи 1.160.000 предмети, а годинава  има примено 1.027.000 предмети. Вкупниот број нерешени предмети изнесува 1.967, појасни Трпескии додаде дека со растот на предметите во Катастарот, расте и бројот на запишаните хипотеки, што е одраз и на државата и стопанството. „Во 2005 година имавме 2.920 хипотеки запишани, во 2012  имаме 10.433 хипотеки. Вредноста на запишаните хипотеки во 2007 година била 456 милиони евра, а во 2011 година 3.654 245.000 евра на запишани недвижности. Оваа година ја завршуваме со 5.000.462.000 евра запишани недвижности оптоварени со хипотеки“,  истакна директорот. Инаку по Нова Година Агенцијата нема да ги води повеќе хипотеките, а граѓаните нема да имаат потреба да бараат потврда од катастар. Сите податоци за хипотеките ќе бидат објавени на веб страницата на Катастарот и во Службен весник. Согласно Законот за катастар на недвижности, од 2008 година Агенцијата ја презеде надлежноста од судовите за водење на Интабулациските книги, а со измени на законот од 2012 година имаше обврска да изврши идентификација на интабулациските книги и тие да ги пренесе во имотните листови, а оние кои не можат да се идентификуваат да се објават на веб страницата на Агенцијата и да се објават во Службен весник на Македонија. Од Катастарот, информираа и дека е извршена контрола на работата на геодетски фирми при што е констатирано неправилности кај 47  и им е изречена глоба, а на три им се одземени дозволите, а контролата ги опфатила и одделенијата на катастарот по општините, при што против шестмина вработени има поднесено кривични пријави. Во однос на запишување на легализираните дивоградби, директорот Трпески информира дека досега се впишани 25 илјади дивоградби и апелираше до сите граѓани кои имаат легализирано објект да го впишат во Катастарот, бидејќи според евиденцијата на Министерството за транспорт и врски бројот на легализирани куќи изнесувал 35 илјади.