„Kaтимерини“ потсети што е договорено за Сонцето од Кутлеш
Објавено во: Македонија 12 Август, 2019
Забраната на употребата на „Сонцето од Вергина“ (ака. Сонцето/Ѕвездата од Кутлеш) на сите
јавни површини во Северна Македонија стапи на сила од понеделник, потсети денеска грчкиот весник „Катимерини“, укажувајќи на тоа дека денеска истекува „транзициониот“ период од шест
месеци предвиден со Преспанскиот договор, кој стапи на сила на 12 февруари 2019-та.
„Втората страна нема повторно да го употребува на кој било начин и во каква било форма симболот порано истакнат на нејзиното поранешно државно знаме. Во рок од шест месеци по влегувањето во сила на оваа спогодба, Втората страна ќе пристапи кон отстранување на симболот истакнат на нејзиното поранешно државно знаме од сите јавни места и од јавна употреба на нејзина територија. Археолошките артефакти не спаѓаат во опфатот на оваа одредба“, стои во членот осум став три од Преспанскиот договор.
Инаку во однос на симболот на поранешното знаме со Сонцето од Кутлеш, државата има преземено обврска уште во 1995 година со Привремената спогодба која обврска значи дека нема да го употребува симболот во јавен простор од страна на јавни и државни институции, потсетуваат од владата.