Ќе има истрага кој ја издал „воената тајна“ зошто премиерот Димитар Ковачевски не се пријавил во војска

Добивај вести на Viber

Министерството за одбрана доцна синоќа објави дека ќе поведе интерна истрага за тоа кој ги објавил документите на социјалните мрежи според кој премиерот Димитар Ковачевски е прогласен за „трајно неспособен“ да биде воено мобилизиран за време на воениот конфликт во 2001.

Според министерството, се работи за „строго доверлив“ документ кој протекол од архивите.

„Документот кој е објавен на социјалните медиуми и презентиран од политичка партија, по првичната проверка претставува документ кој во документација на Министерството за одбрана и Армијата првично е заведен како документ со печат „воена тајна“, а подоцна по носењето на Законот за класифицирани информации, добива класификација „строго доверливо“. Министерството за одбрана, согласно своите надлежности, постапувајќи по Закон и штитејќи ги интересите на државата и на граѓаните, отвора постапка за утврдување на одговорност за несовесно ракување и неовластено објавување на документи со класифицирана содржина. 

Министерството за одбрана ги повикува политичките партии и поединци, во своите настапи и обиди да придобијат политички поени, да стојат понастрана од припадниците на Министерството за одбрана и Армијата, да не ги поттикнуваат на извршување на кривични дела, со кои го нарушуваат сопствениот, но и угледот на Министерството и Армијата“, се огласи Министерството за одбрана.

ВМРО-ДПМНЕ и пратеникот и наедно полковник, Драган Ковачки, го повикаа Ковачевски да се произнесе по овие наводи. Премиерот преку соопштение одговори дека имал оперативен зафат и дека опозицијата се користи со „ниски удари“.