ЌЕ ПОДНЕСЕ ЛИ ОСТАВКА ПРЕМИЕРОТ ЗАЕВ - од Владата велат- се прават консулатции

Добивај вести на Viber

Крајно разочаран од негативниот исход во врска со датумот на земјава, премиерот Зоран Заев доцна синоќа се вратил од Брисел. 

Одредени медиуми јавуваат дека тој размислувал да си поднесе оставка, откако станува се поизвесно дека на Самиотот на лидерите на земјите на ЕУ нема да се испорача позитивна вест за земјава.

Од Владата за Фактор единствено потврдуваат дека во тек се консултации на различни нивоа.

„Премиерот е вратен, се прават консултации на различни нивоа во Владата“, е единствениот став што Фактор успеа да го добие од Владата.

По губењето на речиси сите надежи дека  земјава ќе успее да издејствува датум за преговори од лидерите на земјите во Европската унија, очекувано е да се постави прашањето какви ќе бидат следните политички потези на премиерот Зоран Заев. 

Тој во неколку наврати даде различни изјави во врска со тоа какви ќе бидат неговите натамошни чекори, од таа дека ако нема датум Владата ќе биде практично „мртва“, па до изјавата дека одговорност ќе мора да се понесе, но и дека за земјата не е добро да се одржат вонредни избори.

Фактор разговараше со неколку министри од Владата, дел од СДСМ, а дел од коалициониот партнер ДУИ. Тие ни изјавија дека, барем засега, не се повикани на консултации во Владата. 

Одредени медиуми јавија дека консултации се вршат во владејачката партија СДСМ. Наводно, претставници на владејачката партија се противат на намерата тој да си замине од челното место во Владата, па се обидувале да го разубедат премиерот во ваквата намера. Некои извори тоа го протолкуваа како последен обид да се направи притисок врз европските лидери да се омекне тврдиот став за Македонија. 

Но, партискиот портпарол Костадин Костадинов за Фактор изјави дека премиерот не е во СДСМ во моментов. 

„Премиерот не е во партијата. Се вршат координации на повеќе нивоа. Во партијата има редовни партиски координации“, вели Костадинов за Фактор. 

( Н.Н.Ф.)