Кога и со какви дрвца треба да се пошумат опожарените терени на Осоговските планини?
Објавено во: Македонија 13 Август, 2019
На есен или во пролет откако опожарените терени ќе се расчистат, треба да се изврши пошумување на Осоговските планини.
Шумарскиот инженер во пензија, Ленче Јанковска вели дека прво е потребно теренот темелно да се исчисти, да се направи санитарна сеча, и потоа во есен откако ќе паднат дождови и во почвата ќе има влага, може да се изврши пошумување.
„Направени се големи штети, сепак 150 хектари е голема површина, а за да се обнови дрвната маса, за да биде зрела за сечење треба да поминат 40 до 50 години. Веднаш да се пошуми теренот нема шанси, треба да се почека до есен, така е најдобро. Се пошумува во период кога вегетацијата мирува. Дали треба да се пошуми теренот со зимзелени или листопадни дрвја зависи од тоа за колкава надморска височина се работи. Сепак, најдобро е да се засадат дрвца какви што претходно имало конкретно во таа шума, инаку ако се засадат други видови дрвја тие нема да бидат со ист квалитет. На пример липата ако се засади на одреден терен, за да успее таа си бара влага“, вели Јанковска.
На 11 август издадена е забрана за движење во шума на Осоговските Планини, како дел од превентивните активности за заштита од пожари.
Оваа мерка се презема по гаснењето на големиот шумски пожар во кој изгореа околу 150 хектари борова и друг вид шума во кочанскиот дел на Осоговијата.
Казните за непочитување на забраната за движење во шума и шумско земјиште за граѓаните изнесува од 1.500 до 2.000 евра во денарска противвредност.
Во гаснење на огнената стихија беа ангажирани пожарникари и против пожарна механизација од Кочани, Виница, Штип, Пробиштип и Македонска Каменица, служби од јавното претпријатие „Водовод“ и Македоснки шуми.Но, не се само Осоговските планини, вчера шума гореше и во Дебрца.
Сања Атанасовска