„КОГА САМОХРАНА МАЈКА ПЛАЧЕ, ИЗВРШИТЕЛОТ ВЕЛИ: НЕ СУМ ТИ ЈАС СОЦИЈАЛНА СЛУЖБА“ - Глигорова бара реакција од Обвинителството

Ана Глигорова, активистка за човекови права, излезе со жестока критика до извршителите, но и со повик до Јавното обвинителство, што побрзо да ги процесуира кривичните пријави од граѓани, но и од компании, кои се покренати против дел од извршителите во земјава. 

„Обвинителство соодветно да реагира по допрен глас, но и за веќе пуштените кривични пријави од физички и правни лица против извршителите кои спијат во фиока. Толку кршење на закон, дискриминација на бремени жени, самохрани мајки и татковци, возрасни неподвижни луѓе, инвалиди, ...на кои им се блокирани сметките или им се одзема огромна виртуелна сума од плата или пензија. Овие насилници се заштитени како бели мечки. За многу народ се работи, да потсетам. Ме радува што реагирале за ксенофобија од поткастот, но верувајте обвинители, секој ден се случува оваа ксенофобија и расизам со печат на државата. Како вели извршителот кога самохраната мајка плаче - не сум ти јас социјална служба! Кога пленат имот и влегуваат во детска соба, и пред детски очи грабаат се пред себе. Кога 70 годишен човек, кој се тресе пред нив го лажат за сумата која треба да ја плати од пензија 9.000 денари.Навредуваат и дискриминираат и ограбуваат, знае правобранителот. Ајде ОЈО, бидете правични, не сте вие политичари“, напишала Глигорова во својот пост објавен во фејсбук групата Стоп за приватните извршители.