Кои се хероите на град Скопје за 2017?

Добивај вести на Viber

Најчесто при крајот на годината се прават листи на најдобри спортисти, економисти и политичари, но помалку внимание им се посветува на луѓето кои се дел од службите или пак тие кои несебично ја покажуваат својата хуманост на дело. На мала свеченост градот Скопје им ги додели признанијата на најдобриот пожарникар, полицаец и крводарител.

За најдобар пожарникар е прогласен Џеват Ибраими, командир на одделение  во Бригадата за противпожарна заштита на Град Скопје, најдобар полициски службеник за 2017 година е Зоран Павловски, вработен во Одделението за безбедност на патниот сообраќај при Секторот за внатрешни работи – Скопје, а за најдобар крводарител е прогласен Зоран Стојменовски.

Наградите ги додели Енвер Малиќи, заменик-градоначалникот на Град Скопје.

- Хуманоста е општествена вредност. Таа е дел од нашите принципи.Таа е дел од нашата етика. Скопје е Град на солидарноста и како таков ги негува традициите на хуманост и солидарност спрема сите оние на кои им е потребна помош. За таа цел Град Скопје дополнително ги мотивира оние што најмногу придонеле за промоција на хуманоста со своите дела- истакна  заменик-градоначалникот Енвер Малиќи.

Тој, исто така, им честиташе на добитниците и ја изрази својата надеж дека овие награди освен за лична мотивација ќе послужат и како добар пример  во средината  во која живеат  и работат.

Пожарникарот Џеват Ибраими во текот на 2017 година се истакнал со особено ефикасно и успешно работење. Имено, во рамките на неговата работа учествувал во гаснењето на повеќе пожари и технички интервенции и придонел за намалување на материјалните штети, како  и  за спасување човечки животи.

Најдобриот полицаец за 2017 година е Зоран Павловски, вработен во Одделение за безбедност на патниот сообраќај при Секторот за внатрешни работи – Скопје, кој во текот на 2017 година остварил надпросечни резултати и пожртвувано ги извршувал службените задачи.