Кои се најголеми и кои се најуспешни компании во Прилеп?

Добивај вести на Viber

Колку македонски градови и нивни соседни рурални општини можат да се пофалат дека лани имале над 45 компании кои направиле профит еднаков на или поголем од 100.000 евра? Затоа Прилеп може да се гордее со својата економија и стопанственици кои и во вакви услови лани успеале да завршат добра работа. На пример најголемите пет прилепски фирми лани имаат кумулативен приход што надминува 190 милиони евра

Прилеп лани имал 46 компании кои оствариле профити од најмалку 100.000 евра, ова е официјален податок од базата на ЦРМ. Во Прилеп царува приватната иницијатива затоа што на една рака се бројат државните фирми кои имаат профит што е поголем од 100.000 евра. Овој показател, колку и да е сложена и тешка економската состојба покажува дека Прилеп има силна економија. Може да се каже дека Прилеп е значаен економски центар на југозападна Македонија. Прилепската економија и особено приватната иницијатива е рамо до рамо ако не и посилна од соседната на најголемиот пелагониски ривал Битола (секако ако од рангирањето се исклучи РЕК Битола најголемиот производител на електрична енергија во земјава).

Кои се најголемите прилепски компании?

Странската инвестиција ГЕНТЕРМ специјализирана за производство на електрична и електронска опрема за светските автомобилски гиганти лани имала најголеми приходи од сите прилепски компании. Тие се во ранг на 2018 година и лани изнесуваат 57 милиони евра. Добивката на оваа компанија еден од најголемите работодавци во Пелагонија е 5 милиони евра и е двојно поголема од претходната година.

Македонскиот прехранбен гигант „Витаминка“ лани бележи раст на приходите за 10 отсто во споредба со 2018 година. Тие достигнале 40,9 милиони евра и таа е втора најголема и воедно најголема домашно поседувана компанија во пелагонискиот регион. Оваа успешна компанија, во која најголеми поединечни акционери се тројца членови на семејството Наумоски (поседуваат над 41 отсто од акциите н.з.) лани има профит од 282.000 евра.

Во големата тројка според остварените приходи е најголемата компанија за производство на мермер Мермерен комбинат (доминантно поседувана странска компанија). Лани нејзиниот приход изнесува 36,5 милиони евра и е за 10 отсто понизок од 2018 година. Добивката е 20 милиони евра што ја прави најпофитабилна пелагониска компанија.

Во големата петорка е единствената домашно поседувана пиварница производителот на пивата „Златен Даб“ и „Крали Марко“ и меѓу другите безалкохолни пијалоци на прочуената „Газоза“. Прилепска пиварница лани остварила приход од 31,6 милиони евра што е на ниво од 2018 година, а профитот на компанија во која најголеми акционери се братот и сестрата Самарџиоски (имаат над 72 отсто од акциите н.з.) лани бил 326.000 евра.

Најголемата прилепска текстилна индустрија и лани е Комфи Ангел, поседувана од четири странци и едно домашно физичко лице. Ова друштво лани остварило приход од 27,7 милиони евра (11 отсто подобро од 2018 година) и профит од 1,4 милиони евра што е за 31 отсто подобар резултат од претходната година.

Лани рамо до рамо со грчката тутунска компанија СЕКЕ по долги години е и државниот Тутунски комбинат Прилеп. Двете друштва специјализирани за производство и преработка на тутун (најконвертибилниот прилепски производ заедно со мермерот) оствариле приходи од по 17,9 милиони евра. Добивката на македонската државна компанија е 638.000 евра што е фантастичен резултат за компанија која години наназад работи со загуби. СЕКЕ лани имал профит од 443.000 евра што е за 52 пати подобар резултат во споредба со претходната година.

И уште една домашно поседувана трговска компанија во друштвото на најголемите (т.е. компаниите кои оствариле приход поголем од 10 милиони евра). Тоа е Футура компанија чија дејност е трговија на мало. Нејзини сопственици се Душан Качкиноски и Тони Тарунџиоски. Прометот на ова трговско друштво лани изнесува 13,2 милиони евра што е за 15 отсто подобар резултат од претходната година. Добивката на фирмата лани е повисока за 31 отсто од 2018 година и изнесува 136.000 евра.

Како што напишавме во лидот на текстот Прилеп е град со 45 компании кои имале профити поголеми од 100.000 евра. Еве табеларен приказ на неколку успешни компании кои создаваат нова вредност за прилепската економија: