Кој е махерот што од вадење камен направи 2,2 милиони евра профит за 100 дена?

Добивај вести на Viber

Мермерен комбинат Прилеп менува газди, но не ја менува формата. И годинава за само сто дена направи профит од 2,2 милиони евра односно просечно дневна добивка од 22.000 евра. И речиси целата добивка доаѓа од извоз на мермер на стански пазари. Паралелно со резултатите за добивката, новиот газда им подготви големо разочарување на малите акционери. За откуп на секоја слободна акција понуди само третина од последната пазарна цена на таа акција

Мермерен комбинат Прилеп продолжува со серијата одлични финансиски резултати. Според најновите информации достапни на веб страницата на Македонската берза за хартии од вредност, оваа голема извозна компанија оствари профит од 2,2 милиони евра во првите сто дена годинава. Тоа значи просечно дневно Мермерен правел профит во вредност од 22.000 евра.

Податоците на приходната страна покажуваат дека компанија минимално го зголемила извозот во првите сто дена во споредба со истиот период лани и дека тој на крајот на март годинава изнесува 5,57 милиони евра. На домашниот пазар во овој период компанијата од Прилеп пласирала мермер во вредност од 23.500 евра што е навистина незначително учество во вкупните приходи.

Оперативната добивка на компанијата за овој период изнесува 2,37 милиони евра и во споредба со истиот период лани е пониска за 8 отсто. Причина за овој тренд се зголемените трошоци за продадени производи и услуги за 17 отсто до ниво од 2,41 милиони евра.

Значајно за истакнување тука е зголемувањето на трошоците за вработените за 20 отсто во споредба со истиот период претходната година. Ова значи дека компанијата води активна политика на анулирање на инфлаторните тенденции и се грижи за стандарот на своите вработени. За нивните плати и другите трошоци поврзани со платите и надоместоците друштвото исплатило еден милион евра за три месеци.

Мермерен комбинат Прилеп неодамна беше актуелен заради промената на мнозинскиот сопственик. Токму по превземањето на мнозинскиот пакет акции, согласно законските прописи, стигна и намерата за превземање на сите слободни акции од другите малцински акционери. Понудувачот побара, а надлежниот регулатор Комисијата за хартии од вредност (КХВ) издаде решение со кое издаде дозвола за понуда за превземање. Сепак успешноста на понудата е неизвесна затоа што дојде големо разочарување за малите акционери. Цената што новиот газда ја нуди за секоја акција изнесува само 900 денари што е само една третина од последната пазарна цена за таа акција постигната пред повеќе од една година. Документот е достапен на следниот линк https://dejure.mk/zakon/reshenie-za-izdavanje-dozvola-za-ponuda-za-prezemanje-9?fbclid=IwAR3eQ0GjLmSK1ILNdnH3eAsZoLhVAsPT5QvrjTn8TTZ6HGsCDXkWM9V5mMg