Кој ќе земе 3,65 милиони евра за да копа јаловина во РЕК Битола?

Добивај вести на Viber

Кој ќе земе 3,65 милиони евра за да копа јаловина во РЕК Битола?

Три градежни компании склучија договори со РЕК Битола за да копаат и да транспортираат јаловина во откопните полиња на рудникот „Суводол“. Со овие три договори  вредноста на договорите за ангажман на туѓа механизација во РЕК Битола надмина 20 милиони евра. Колку багери и камиони ќе купеа или ќе земеа на лизинг со тие пари?

Три градежни фирми добија тендери за ископ на јаловина во рудникот „Суводол“ на РЕК Битола и за една година ќе наплатат 3,65 милиони евра, ова се податоци кои можат да ја најдат на официјалната евиденција на Бирото за јавни набавки. Трите компании добиле тендери за ископ на јаловина на три ископни полиња во рудникот „Суводол“. Ископот на јаловина е постапка која мора да претходи пред да почне експлоатацијата на јаглен. Тоа е покривка која е земја и мора да се откопа за се создаде фронт за работа за копање јаглен.

Според достапните податоци трите компании ископот ќе го вршат со сопствени багери и ќе ја транспортираат јаловината со сопствени камиони. Договорите им траат една година од потпишувањето, а се склучени на почетокот на овој месец. Битолската компанија „Рубитон“ ја доби работата за ископ на јаловина за откопно поле Б (инвестициска раскривка) и нејзината цена за ископ е најниска во споредба со другите две добитни компании и изнесува 1.106 денари за кубен метар. Вкупната вредност на договорот е 1,185 милиони евра. „Гранит“ ќе работи на откопното поле А и неговата цена за кубен метар е 1.113 денари, а вкупната вредност на договорот со вклучен ДДВ е 1.276 милиони евра. Компанијата што има иста цена со „Гранит“ е битолската „Марковски компани“ и таа ќе работи на откопното поле Ц. Вредноста на неговиот договор е 1,185 милиони евра.

Овие три се последните тендери што РЕК Битола ги склучи за своите потреби за ископ. РЕК Битола нема доволно градежна механизација и машини за да ги задоволи своите потреби за ископ и заради тоа ангажира надворешни фирми да копаат и да транспортираат јаглен и јаловина во нејзините рудници. Јагленот е погонско гориво од кое во трите блока на термоелектричната централа во Битола се произведува повеќе од половината од струјата што воопшто се произведува во Република Македонија.

Раководството на ЕЛЕМ пред неколки месеци соопшти дека распишале тендер за набавка на механизација по што во РЕК Битола ќе може во најголема мерка потребите за ископ и за транспорт на јаглен да се задоволат со сопствена механизација, товарни и транспортни машини. За таа цел „Фактор“ достави прашања во кои побаравме одговори за тоа во која фаза е постапката за набавка, кога очекуваат да заврши и што се ќе се набави од механизација. Доколку добиеме одговори ќе ги објавиме во целост.

Кој ќе земе 20 милиони евра од РЕК Битола за копање јаглен и јаловина?

Според официјалната евиденција на јавни набавки за потребите на РЕК Битола достапна на агрегаторот за вести time.mk од почетокот на годинава до сега 6 фирми склучиле договори со кои од нив ќе биде ангажирана механизација и кадар за ископ и транспорт на јаглен и на јаловина. Битолски „Пелистер“ има два договори за ископ на јаглен и јаловина вредни 8,63 милиони евра, битолската фирма „Марковски компани“ има два договори од кои едниот е за услуги од градежна механизација на повик од РЕК и другиот е за ангажман на механизација за ископ на јаловина во „Суводол“ и тие вредат 5,3 милиони евра. „Гранит“ има еден договор за ископ на јаловина вреден 1,28 милиони евра, скопската фирма „МИС Комерц“ има еден договор за услуги од градежна механизација вреден 3,7 милиони евра, а битолски „Рубитон“ има договор за ископ на јаловина вреден 1,185 милиони евра, а „Руд Коп“ од Битола има договор за помошна механизација за потребите на РЕК вреден 0,58 милиони евра.