Кој не сака да чека државно, ќе си плати приватно 750 евра за операција на катаракта

Добивај вести на Viber

Ќе се намалува времето за чекање на пациентите кои имаат потреба од операцијата на катаракта(очно перде). Според денешната најава на министерот за здравство, Никола Тодоров, ако досега годишно се изведувале 500 операции, бројката ќе порасне на 1.200, а покрај во Скопје, повеќе пациенти ќе се оперираат во Битола, Тетово, Штип, Прилеп и Струмица. Ова, се надева министерот, ќе го намали времето за чекање за операција од шест на два месеци. Во рамки на својата дополнителна дејност лекарите ќе може да ја изведат операцијата, но пациентите тогаш ќе платат 46.300 денари. Од оваа сума 14.630 ќе биде за тимот кој ја изведува интервенцијата. „Оние на кои не им се чека, а се поимотни, може да побараат во јавните здравствени установи да се оперираат приватно во рамки на дополнителната дејност и ќе треба да платат 46.300 денари. Идејата не е листите на чекање да се намалат со тоа што пациентите ќе се препраќаат приватно да се оперираат, но тоа во Германија драстично ги намалило листите на чекање, кои се помали од два месеци", изјави Тодоров. Со новата мерка за унапредување на офталмологијата треба да зајакнат постојните капацитети на регионалните болници. Министерот Тодоров истакна дека по 200 интервенции повеќе ќе се изведуваат во Штип, Прилеп и Тетово, а ако има потреба ќе оперираат таму и лекари од Скопје. Во Струмица исто така ќе започне да се изведува оваа интервенција, каде ќе се оперираат по 100 пациенти. На пациентите кои имаат закажано операција на катаракта во Скопје,  а се од посочените градови, ќе се известат по телефон и ќе бидат информирани кога и каде ќе им биде извршена операцијата.