КОЈ ПРАТЕНИК НЕ СЕ ПОТПИША НА БАРАЊЕТО - Изет Меџити да биде новиот координатор на пратеничката група на ДУИ

Добивај вести на Viber

Координатор на пратеничката група на ДУИ ќе биде Изет Меџити, поранешниот градоначалник на Чаир. 

Во претходниот состав координатор на пратеничката група на ДУИ беше Ејуп Алими.  

Заменик координатор, пак, ќе биде Арбр Адеми, досегашниот министер за образование и наука. 

На ова барање за координатори на пратеничката група на ДУИ стои дека е потпишано од 14 пратеници. 

Се поставува прашањето кој е пратеникот што не се потпишал, со оглед што ДУИ освои 15 пратенички места. 

Дали можеби тоа е пратеникот Арбен Зибери од оваа партија?

Како што вчера јавија медиумите, Арбен Зибери, новиот пратеник на ДУИ, се врати вчера во парламентот, по речиси две недели отсуство поради ковид-19.

Спикерот Талат Џафери ги информираше пратениците дека Зибери, кој на претпоследната собраниска седница на 30 август гласаше од посебна кабина за изборот на новата Влада, како суспектен на ковид-19, имал два последователни негативни теста, така што, согласно со новите протоколи, нема решение за изолација и може да се врати на работа.

Пратеникот Исмаил Јахоски, пак, неодамна негираше дека ја напуштил пратеничката група на ДУИ, во кое нагласи дека на веб-сајтот на Собранието е направена техничка грешка.

Или е тоа можеби некој сосема трет пратеник кој не бил во состојба да го стави својот потпис на барањето.

Според сознанијата од Собранието, непотпишан е претседателот на Собранието, Талат Џафери.

Јован Митревски од СДСМ, пак, како и досега ќе ја координира пратеничката група на Социјалдемократскиот сојуз во Собранието. 

Заменик координатор ќе биде Соња Мираковска.

Пратеничката група на коалицијата Можеме, која брои 46 пратеници, за вториот заменик-координатор, ќе прати дополнително известување. Сите 46 пратеници се потпишани на барањето. 

Координатор на коалицијата Обнова за Македонија, која брои 44 пратеници, предводена од ВМРО-ДПМНЕ, пак, повторно ќе биде пратеникот Никола Мицевски од таа партија. 

Заменички координатори ќе бидат пак, Дафина Стоноска и Ели Панова. 

Од Алијанса за Албанците и Алтернатива, за координатор е предложен Скендер Реџепи, додеја заменици ќе бидат Сурија Рашиди и Илире Даути. Ова барање е потпишано од 12 пратеници на оваа коалиција. 

За да се формира пратеничка група, како што е познато, таа треба да се состои од најмалку 5 пратеника.