КОЈА ФИРМА КОЛКУ И КАКО ПОМОГНА - СКМ апелира сите компании да го сторат тоа

Добивај вести на Viber

Ова е време кога сите заедно треба да преживееме. Притоа, секој го прави тоа што може и помага колку може.

Зоран Јовановски, главен советник на Управниот одбор на Стопанската комора на Македонија за економски прашања, нагласува дека од почетокот на коронавирус кризата, бројни компании ја покажаа својата грижа за пошироката заедница. Да споменеме само некои од нив, вели Јовановски.

„Алкалоид“ донираше финансиски средства за помош во Министерството за здравство и ги намали цените на 158 свои производи.

„Макпетрол“ и „Усје“ донираа финансиски средства на Министерството за здравство за набавка на медицинска опрема. 

Клиниката „Жан Митрев“ ги понуди своите капацитети за искористување за потребите на државата.

„Кромберг и Шуберт“ донираше медицинска опрема и материјали за Клиничката болница во Битола, а „Монтенегро маркети“ за општата болница во Гостивар.

За лицата што доаѓаат од странство и треба да поминат одреден период во карантин понудени се бројни сместувачки капацитети, Хотелите „Ибис Центар“ и „Ибис Стајл“ заедно со медицинска поддршка од „Аџибадем Систина“, хотелот „Стоун Бриџ“ во Скопје, хотелот „Макпетрол“ во Маврово, хотелот „Епинал“ во Битола, „Казино Фламинго хотел“ во Гевгелија. 

„Комфи Ангел“ од Прилеп донира дел од сопственото производство на перници, јоргани, а наскоро и заштитни маски.

Компанијата „Ваурон“ донираше прочистувачи на воздухот на Инфективната клиника во Скопје.

„Жито Лукс“ во соработка со „Црвен крст“ донираше леб за социјално загрозените лица и семејства.

„ЕВН“ и „ЕЛЕМ“ за 24 часа по добивање на барањето обезбедија осветлување на безбедносните пунктови Бошков Мост и Глобочица во регионот на Дебар.

Мобилните оператори „Македонски Телеком“ и „А1“ на своите корисници им донираа бесплатен мобилен интернет и им овозможија бесплатно следење на дополнителни ТВ канали, за полесно поминување на времето дома.

„Ова е само дел од компаниите што досега помогнале. Во оваа прилика, како Стопанска комора на Македонија апелираме, не само до членките на комората, туку и до сите други компании, во рамките на своите можности да и’ помогнат на пошироката заедница за да можеме сите заедно полесно да ги пребродиме овие тешки времиња“, вели Јовановски.