КОЛКАВИ ЌЕ БИДАТ КАЗНИТЕ И ОД КОГА - маските од денеска задолжителни за прилепчани, кумановци и тетовци

Добивај вести на Viber

Прилепчани, кумановци и тетовци од денеска мораат да носат маски, марами, шалови, или што било друго за да се покријат устата и носот. 

Според Владата која ја донесе оваа мерка на една неодамнешна седница, е да се создадат услови за повеќе движење, а притоа да се гарантира нивна заштитата.

„Се воведува мерка за забрана за движење на населението на подрачјата на општините Куманово, Тетово и Прилеп, без носење на соодветна заштитна опрема (маска, шал, марама и сл.) надвор од своите домови, на сите јавни места и површини од отворен и затворен тип, како и затворени простории, маркети, продавници или сл“, гласеше владиното соопштение. 

Властите препорачуваат граѓаните да го редуцираат излегувањето од своите домови, и тоа само од најнеопходни причини, заради одење на работа, како и излегување од својот дом на само еден член од семејството заради купување намирници и лекови од маркетите и аптеките.

Колкави ќе бидат казните за непочитување на овие мерки, засега не се знае. Тоа треба да го уреди Министерството за правда, со Уредба која ќе има законска сила. Од власта најавија дека првично ќе се даваат само опомени, а дури потоа казни. Ако дојде до изрекување казна, полицијата ќе има обврска да има фотографија со која ќе ја оправда мандатната казна.