Колку „македонски зачини“ ќе се вмешаат во американските избори

Добивај вести на Viber

Доналд Трамп, слично како во кампањата за избор на американски претседател во 2016 година, заостанува на сите анкети зад демократката Камала Харис, но и нема да биде изненадување повторно да победи како што тоа му успеа против Хилари Клинтон.

Тој пораз на Демократите беше многу болен, и често, па дури и самата Хилари Клинтон, во јавните настапи говореше дека „страните со лажни вести од Велес, Македонија“ биле пресудни да се „излаже“ американскиот електорат. Сега, условите и технологијата за такво нешто се драстично променети.

Сепак, и натаму меѓу македонските „хастлери“ постои желба повторно да учествуваат во кампањата за американските избори, да креираат вирални содржини (најчесто во корист на Трамп) да ги монетизираат со вредната американска публика и на тој начин дебело и брзо да заработат.

Но, тактиките сега се различни, пред се поради најавата на Марк Цукерберг дека Фејсбук „ги научил лекциите од минатото“ и дека на овие избори платформата ќе биде неутрална, односно повеќе ќе се фокусира на објавите од вашите пријатели, отколку на бројните политички страни и групи кои шират различни пропагандни содржини.

Затоа македонските ентузијасти, се надеваат дека повеќе шанси имаат на платформите за видео содржини, особено Јутјуб каде монетазицијата е зголемена, но и на останите социјални мрежи кои не се многу популарни во Македонија како Рамбл, мрежата основана од Крис Павловски претприемачот со македонско потекло и Truth Social, мрежата која ја создаде Доналд Трамп откако беше баниран од сите главни мрежи по упадот на демонстрантите во Капитол Хил.

Идејата е да се креираат видеа со наративи поврзани со американските избори кои би станале вирални, а во кои најчесто ќе се појавува републиканскиот кандидат Доналд Трамп. Исто така на овие мрежи често се шират видеа со теории на заговор и параноични содржини на конзервативните инфлуенсери, дека наскоро ќе почне нова Граѓанска војна во САД и дека белите хетеросексуални мажи се под директна закана.

Би било навистина интересно да се види дали и Камала Харис повторно ќе го впери прстот кон лажните вести и мрежата на пропагатори, која се шири од Русија до Балканот и Македонија, но во која се почесто се вклучени и американски инфлуенсери, директно платени од офшор сметки на Кремљ.

Трамп не ги напаѓа „алтернативните“ креатори на содржини, дури напротив во последно време ја смени медиумската тактика, и наместо да гостува на традиционалните медиумски мрежи, се почесто гостува на подкасти кои засилено ја промовираат конзервативната страна.

Неговите гостувања се вистинско богатство за ремикси, и креирање илјадници кратки клипови (рилсови) кои веднаш стануваат вирални и ја засилуваат неговата кампања пред ноемвриските избори.

Да потсетиме дека неодамна гости на македонскиот политички врв беа токму Крис Павловски, основачот на Рамбл, чија техничка поддршка се води преку македонска компанија, како и на Девин Нунез актуелниот директор на Трамп Медиа компанијата задолжена за социјалните мрежи на претседателскиот кандидат.

Од самите посети немеше никакви спектакуларни владини соопштенија, освен дека ќе се работи на подобрување на дигиталната инфраструктура во земјава и дека се разговарало за меѓусебна поддршка и инвестиции со влијателните гости од странство.

Владејачката структура не крие дека има симпатии кон Доналд Трамп иако јавно не се определила за еден од двајцата кандидати, чиј избор ќе има огромно влијание како на Балканот така и на целиот свет.

Обидот да се пласираат содржините за американските избори оди и преку апликацијата за доверливи пораки Телеграм, чиј основач Павел Дуров беше уапсен во Париз, за наводно одбивање да соработува со властите за спречување да се шири пропаганда, говор на омраза и криминални активности.

Поддршка за Дуров стигна и од Павловски, кој исто така се пожали дека Рамбл е на мета на француските власти. Имено, Рамбл има поставено јасни правила за каков вид содржини одобрува, и дека на платформата е забрането ширење говор на омраза, расизам или антисемитизам, меѓу другото.

Треба да се потсети дека активностите за пласирање вести, макар биле и лажни или теории на заговор, не се легални и не се водени од идеолошки побуди, туку се мотивирани од потребата да се заработи брзо и лесно, користејќи ги системите за монетизација на содржини на социјалните мрежи.