Добивај вести на Viber
Од менаџментот смируваат дека загубата во значајна мера е резултат на резервирани срества само заради лошата кредитна кондиција на само еден голем клиент
„Комерцијална банка“ првите три месеци годинава ги заврши со загуба од 526,8 милиони денари (8,55 милиони евра). Со овој финансиски резултат најголемата домашна деловна банка четврта година по ред книжи загуба во првиот квартал, покажуваат податоците од архивата на Македонската берза. Најлошиот финансиски резултат доаѓа истовремено со најдобриот резултат – рекордно висок нето приход од камати во износ од 722,8 милиони денари!
„Комерцијална банка“ нема добивка во првиот квартал од 2011 година досега, а годинава периодот јануари – март бил најлош за банката заради тоа што загубата е најголема во споредба со сите други негативни резултати за првиот квартал од 2012, 2013 и 2014 година.
Менаџментот на банката во Коментарот кон финансиските резултати, објавен на берзата, смирува дека негативниот финансиски резултат во значајна мерка се должи на резервациите кои банката морала да ги издвои заради влошената кредитна кондиција на еден голем клиенти, чиј назив не се открива. Од споредбата на податоците очигледно е дека резервациите во овој квартал изнесуваат 829,65 милиони денари (безмалку 13,5 милиони евра) и во споредба со првото тромесечје лани се поголеми за 494 милиони денари!
Сепак ова не се изгубени средства заради тоа што доколку клиентот успее да се консолидира и да ги плаќа своите обврски во тој случај банката ќе може средствата кои сега се резервирани за обврски кои не се платени да ги ослободи и тоа во голема мерка поволно ќе влијае врз билансот на успех на најголемата банка во која доминантни сопственици се домашни акционери.
![komerc](http://faktor.mk/wp-content/uploads/2015/05/komerc.jpg)
Најлошиот финансиски резултат на банката доаѓа во време кога значаен раст бележат нето приходите од камати како и нето приходите од надоместоци. Нето приходот од камати за прв квартал е 722,8 милиони денари и е највисок во споредба со резултати за прв квартал од 2011 година досега. Солиден резултат банката има и во втората приходна ставка, а тоа се нето приходите од надоместоци. Тие за три месеци изнесуваат 219,9 милиони денари и во споредба со истиот период лани пораснале за речиси 5,5 милиони денари.
Р.Ф.