КОВАЧЕВ ЌЕ БАРА ВМРО-ДПМНЕ ДА БИДЕ ИСКЛУЧЕНА ОД ЕПП: Македонските политичари ги обвини дека со Вучиќ и Обран ќе отидат во Кина и Русија

Добивај вести на Viber

Ќе побараме ВМРО-ДПМНЕ да биде исклучена од ЕПП, вели бугарскиот европратеник Андреј Ковачев. 

Европратеникот рече дека ВМРО-ДПМНЕ на секој начин покажува дека сака да се приклучи кон Фидес, партијата на унгарскиот премиер Виктор Орбан бидејќи, како што вели, се оддалечува од вредностите на ЕПП.

Бугарскиот европратеник од редовите на ГЕРБ, Ковачев, дел од Европската народна партија (ЕПП), бара партијата да ја исклучи ВМРО-ДПМНЕ, која е дел од ова „семејство“ на партии од десниот центар во Европа.

„Европската народна партија е информирана за политиката на ВМРО-ДПМНЕ кон Бугарија. Постојат опции за замрзнување на членството и отстранување на партијата од групата“, вели Ковачев. 

Тврди дека Македонија провоцира, а Бугарија нема вина. 

„Се обидуваат да нè испровоцираат за да може ние да бидеме виновниците, а тие да одат каде што отидоа со Вучиќ и Орбан во Кина и Русија. Ова е геополитичкиот наратив“, додава Ковачев. 

За ова барање, македонскиот премиер Христијан Мицкоски вели дека не е 1-ви април, но ова би била добра првоаприлска шега. 

Тензиите на релација Македонија - Бугарија се вратија на сцена откако бугарскиот претседател Румен Радев ја пречека македонската претседателка Гордана Сиљановска-Давкова без македонско знаме, односно со две бугарски знамиња. 

На ова, македонскиот вицепремиер Александар Николоски рече дека домаќинот бил нецивилизиран, на што бугарските власти се налутија и бараат негова оставка.