ТИЕ ШТО ИМААТ ВОДА ИМААТ, А ТИЕ ШТО НЕМААТ ДА НЕ БРЗААТ КОГА ЌЕ ДОЈДЕ - еве какви препораки даде Институтот за јавно здравје

Добивај вести на Viber

Дел од граѓаните, иако гасење на водата беше најавено за нивните населби, се уште имаат вода. 

Таква е на пример општината Кисела Вода, каде се досега, водата нема секнато од чешмите. 

Дел од медиумите пак јавуваат дека, според нивни извори, интервенцијата на водоводната цевка на улицата Никола Парапунов во Карпош, е при крај. 

Според најавите на „Водовод и канализација“ се очекува зафатот да трае 15 часа, што значи дека водата попладне ќе се врати во чешмите.

Институтот за јавно здравје денеска издаде препораки кои чекори треба да се преземат одкако водата ќе биде пуштена.

„Имајќи предвид дека е најавен прекин на водоснабдувањето, населението треба да биде запознаено и информирано дека ризиците по здравјето може да се јават не само за време на недостатокот на вода туку, дури и да се зголемат после пуштањето на водата за пиење во водоводната мрежа односно по отстранување на дефектот“, соопшти ИЈЗ.

Како превентивни здравствени мерки и мерки на внимателност од ИЈЗ препорачуваат.

– Граѓаните да не ја пијат веднаш водата по нејзиното пуштање во водоводната мрежа зашто контактното време на резидуалниот хлор и водата во мрежата (време потребно резидуалниот хлор да почне да делува врз микробиомот присутен во водата), во услови на пониски амбиентни температури може да потрае и до 1 час.

– Може да се очекува водата за пиење по пуштањето во водоводната мрежа да ја промени бојата, да добие невообичаен мирис, да има видлива заматеност или евентуално страни тела, како ситни зрнца песок, инсекти и сл. Во таков случај, повторно се препорачува водата да не се пие сè до момент на стабилизација на тие органолептички својства (боја, мирис, вкус, заматеност).

– По добро истекување на водата, потребно е почесто и добро да се исчистат мрежичките на чешмите (со средство за чистење бања или бел оцет).

– Како дополнителна мерка на внимателност се препорачува, доколку граѓаните сепак одлучат веднаш да ја пијат водата, истата да се преврие многу кратко (1-2 минути), потоа да се разлади и да се консумира.

– Граѓаните треба да имаат предвид дека превриената вода го губи благопријатниот вкус. Истиот може да се подобри доколку водата се претура од една во друга чаша неколку пати, со цел да врзе повеќе кислород од воздухот (процес наречен аерација).

– Најдобро е во текот на првите часови после пуштањето на водата во водоводната мрежа, граѓаните сè уште да консумираат пакувана вода, сè до добивањето на известување од јавното претпријатие дека водата е исправна и безбедна за консумација.

– Во однос на водата за капење, препорачуваме после доаѓањето на водата во водоводната мрежа, задолжително да се зголеми температурата на водата во бојлерите (во кујна, бања и сл.), со цел дополнително превентивно термичко уништување на бактериите доколку потенцијално навлегле во водоводната мрежа.

– Најдобро е температурата на топлата вода во чешмите да биде над 55 степени, но сепак потребна е мерка на внимателност да не дојде до изгореници, особено кај мали деца или повозрасни лица.

Од ИЗЈ додаваат дека е важно да се почитуваат препораките од надлежните институции.