Ковачевски ги негира тврдењата на бугарските медиуми дека неговата сопруга е Бугарка

Добивај вести на Viber

Мојата сопруга е родена во Крива Паланка, не можам да коментирам за нејзините предци, вели премиерот Димитар Ковачевски. 

По вчерашните написи во одредени медиуми дека неговата сопруга има бугарско потекло, Ковачевски рече дека таа и нејзиниот татко и дедо се родени во земјава. За предците на семејството, тој додаде дека навистина не може да коментира во такви детали затоа што, како што рече, „да се зборува за прадедовци, чукундедовци навистина тоа не било никогаш тема на разговор“. 

„Не знам зошто би биле од интерес потеклото на роднините на мојата сопруга, меѓутоа еве штом е тука прашањето – таткото на мојата сопруга е роден во Куманово, дедото на мојата сопруга е роден во Крива Паланка, мојата сопруга е родена во Крива Паланка, јас сум роден во Куманово. Нашите деца се родени во Скопје и сите ние поседуваме лични документи на Република Северна Македонија“, рече Ковачевски. 

Инаку, бугарскиот весник „Труд“ тврди дека Елена Ковачевска, сопруга на Димитар Ковачевски и нејзините дедо и татко се Бугари, но премиерот негира. Тој вели дека целото семејство имаат само македонски документи.

Според бугарските медиуми, документот за потеклото на сопругата на Ковачевски пристигнал на мејлот на весникот „Труд“. 

„Консултациите со лица кои детално го познаваат процесот на стекнување бугарско државјанство, покажа дека документот ги содржи сите потребни атрибути за да биде вистинито. Според неговата содржина, таткото и дедото на Елена Ковачевска – Митко Станојковски и Станојко Станојковски се Бугари родени во општина Босилеград“, се вели во текстот на „Труд“.

Бугарија во повеќе наврати ги спомена и Македонците кои од економски причини земаат бугарски пасоши. Говореа за бројка која достигнува и до 120.000 македонски граѓани кои поседуваат бугарски пасоши.