Кремљ го негира договорот со Атина за аванс од 5 милијарди евра за „Турски поток“
Објавено во: Балкан, Економија 18 Април, 2015
Русија го негираше извештајот на германските медиуми, кои навестија дека може да се потпише договор за гасоводот „Турски поток“ со Грција до вторник, со кој може да се донесат авансно до 5 милијарди евра во празната државната каса на Атина.
Германското издание „Шпигел“, цитирајќи ја високата фигура во грчката владејачка партија СИРИЗА, напиша дека обезбедувањето авансни средства може да „сврти нова страница“ за Атина, која сега се обидува да постигне договор со своите кредитори, за да добие нови заеми и да избегне испаѓање од еврозоната.
„Не, нема никаков договор“, изјавил портпаролот на Кремљ, Дмитриј Песков во коментар, цитиран од РИА „Новости“.
Песков потврдил дека Грците не барале финансиска помош за време на разговорите во Кремљ при посетата меѓу грчкиот премиер Алексис Ципрас и рускиот претседател Владимир Путин.
„Секако, прашањето за енергетската соработка било подигнато. Природно по преговорите на високо ниво, се согласиле дека на експертско ниво ќе биде спроведено истражување на сите прашања поврзани со соработката во сферата на енергетиката, а Русија не ветува финансиска помош, бидејќи никој не ја сака“, истакнал Песков.
За време на посетата на Москва, Ципрас изрази интерес за учество на Грција во гасоводот „Турски поток“, кој ќе пренесува руски гас за Европа преку Турција и Грција.
Согласно предложениот договор, Грција ќе добие авансни финансиски средства од Русија врз основа на очекуваните идни добивки поврзани со гасоводот. Грчкиот министер за енергетика изјавил минатата недела дека Атина ќе ги враќа парите на Москва по 2019 година, кога гасоводот се очекува да почне да работи.