Курц: Без Русија нема мир во Европа

Добивај вести на Viber

Министерот за надворешни работи на Австрија, Себастијан Курц, рекол во Брисел дека мирот во европа е можен само со Русија. Тој навел и дека ЕУ треба да развива стратегија за долгорочно поставување на односите со Русија. „Сметам дека е погрешно само да се реагира на случувањата. Потребна е стратешка дискусија со што би се дошло до нова фаза“, порачал Курц пред почетокот на состанокот на шефовите на дипломатиите на државите членки на ЕУ. Тој изразил надеж дека ќе успее пронаоѓањето мирољубиво решение , дека мировниот план од Минск ќе стане реалност и дека ќе постои стабилен однос со Русија. „Мирот во Европа е возможен само со Русија“, рекол Курц додавајќи дека тоа не значи прифаќање на анексијата на Крим. Шефот на германската дипломатија Франк – Валтер Штајнмаер, нагласил дека на овој состанок нема да има донесување одлуки во врска со ситуацијата во Украина. Тој истакнал дека министрите ќе ги разгледуваат подготовките за многупосакуваниот Самит кој би требало да се одржи во Астани на кој би требало да се сретнат претставници на Украина и Русија. Штајнмаер нагласил дека тема на разговор ќе бидат и неодамнешните напади во Париз, оценувајќи дека нападите во Франција го промениле светот и Европа. И Курц подвлекол дека во борбата против Исламската држава потребна е силна коалиција, а со тоа и потесен дијалог на ЕУ со муслиманскиот свет. „Доколку сакаме на своја страна да ги имаме муслиманските земји тогаш мора да ја зајакнеме основата на дијалогот“, подвлекол Курц додавајќи дека на денешниот состанок ќе се разговара не само за терористичките напади во Париз , туку и за тоа кои безбедносно – политички и превентивни мерки може да ги преземе ЕУ. Курц укажал дека до сега 5.000 лица од Европа заминале во џихад и додал дека тие, кога би се вратиле, би претставувале голем безбедносен ризик.