Лавров: Ниту Крим, ниту Донбас, ниту Новорусија, како територија, никогаш не биле наша цел

Добивај вести на Viber

Рускиот шеф на дипломатијата,  Сергеј Лавров тврди дека Русија никогаш немала намера да окупира украински територии, туку само сакала да го заштити рускиот народ.

Лавров тврди дека Москва „отсекогаш сакала да го заштити рускиот народ кој живеел на споменатите територии стотици години“. Тој исто така рече дека за време на претседателствувањето на Володимир Зеленски, Украина донела закони чија цел, тврди тој, била да ги уништи правата на оние кои зборуваат руски.

„Сакам уште еднаш да нагласам дека никогаш не сме рекле дека треба да окупираме само некои територии. Ниту Крим, ниту Донбас, ниту Новорусија, како територија, никогаш не биле наша цел“, рече Лавров во интервју за руската државна телевизија.

Изјавата на Лавров доаѓа во време на интензивирани дипломатски активности. На 15 август се одржаа разговори меѓу американскиот претседател Доналд Трамп и рускиот претседател Владимир Путин. По средбата со украинскиот претседател Володимир Зеленски и европските претставници во Вашингтон на 18 август, Трамп изрази надеж за што поскоро организирање на американско-украинско-руски разговори. Но, неизвесно е дали тие ќе се одржат и каде. Од час во час има нови информации за тоа прашање. Војната во Украина почна пред 3.5 години.