ЛДП: Да се забрани Тик-Ток за малолетници по примерот на Албанија

Добивај вести на Viber

Либерално-демократската партија(ЛДП) бара забрана на Тик-Ток за малолетници по примерот на Албанија и регулирање на работата на другите социјални мрежи. 

ЛДП уште еднаш потсетува на предлогот кој лани го достави до МОН непосредно по немилите настани во соседна Србија, со кој се бара контрола на содржината која се емитува на социјалните мрежи, како и забрана на содржини кои поттикнуваат насилство.

„Апелираме до сите вклучени страни за започнување на итна постапка за регулација и контрола на содржината на социјалните мрежи, со цел спречување и избегнување на идни вакви немили настани и несакани состојби, особено кога се работи за здравјето и добросостојбата на нашите деца. Не смееме да дозволиме уште деца да бидат жртви на злоупотребата на Тик-Ток и останатите социјални мрежи“, велат од ЛДП. 

Република Албанија е првата држава во регионот која го забранува Тик-Ток, откако премиерот Еди Рама директно ги обвини социјалните мрежи за споделување и поттикнување на насилство меѓу децата во и надвор од училиштата, а кулминираше со смртта на 14-годишно момче во ноември. Франција, Германија, Белгија и други земји веќе имаат воведено рестриктивни мерки на сила за регулирање на употребата на социјалните мрежи од страна на малолетниците.

Во Македонија, повеќе деца беа повредени додека го изведуваа предизвикот „Супермен“, каде најмладиот од повредените има само 10 години. 

Според албанскиот премиер Рама, одлуката на неговата влада за забрана на платформата на една година не е избрзана реакција на обичен настан. Во Албанија одлуки носат Албанците, а не сопствениците на алгоритмот Тик-Ток.