Обвинение за штипјанецот кој ја задави Емилија

Добивај вести на Viber

Основното јавно обвинителство Штип поднесе Обвинителен акт против 33-годишниот Ф.З. за убиство на 28-годишната Емилија во ноември во штипската месност Суитлак.  Јавниот обвинител до Основниот суд во Штип достави и предлог за продолжување на претходно определената мерка притвор за обвинетиот.

„Во текот на истрагата се обезбедија докази според кои обвинетиот на 1 ноември, при вршење семејно насилство, со умисла ја лишил од живот својата вонбрачна партнерка. Откако се договориле и се сретнале пред нејзиниот дом, заедно отишле во напуштен објект на ЈП Исар за да разговараат за проблемите во нивната повеќегодишна врска. Разговорот преминал во расправија, по што обвинетиот физички ја нападнал жртвата и започнал да ја удира со тупаници. Кога таа паднала на подот, тој започнал силно да ја стега во пределот на вратот додека не дошло до прекин на дишењето и нарушување на дотокот на крв во мозокот, како резултат на што жената починала. Кога се уверил дека не дава знаци на живот тој го напуштил местото и сам се пријавил во полициска станица“, објави Обвинителството.

Насилникот пред извесно време излегол од затвор и наместо да се врати ресоцијализиран, го извршил најтешкото кривично дело убиство. Обвинителството покрена истрага, а судијата во претходна постапка му одреди мерка притвор во траење од 30 дена.

Ф.З. со голи раце ја удави својата партнерка во близина на штипската зоолошка градина. Според истрагата, мотивот за убиството била љубомора. Пред да ја задават во нејзината куќа, двајцата се расправале, по што осомничениот убиец почнал да ја тепа и на крајот и го одземал здивот задавувајќи ја до смрт. Откако ја убил, отишол во полиција сам да се пријави. 

Семејството на Емилија откри дека го известиле и Центарот за социјални работи и полицијата, но наместо превентива од надлежните, стигнала најлошата вест: дека нивната ќерка е убиена.