МАКЕДОНИЈА ЗОВРЕ ОД ИНТЕРВЈУТО НА ЛАТАС - фрчат осуди и барања за санкции, Латас вели дека не спомнал силување, луѓето се испокараа на социјалните мрежи

Добивај вести на Viber

Вчерашниот викенд ден кој требаше да биде релативно мирен, особено поради сончевото време и отсуството на други драматични светски и државни настани, всушност може целосно да биде прогласен за бурен, поради интервјуто на новинарот Драган Павловиќ Латас дадено за јутјуберот Стефан Лазарв.

Лавина од реакции пристигнаа од сите страни, главно со осуда за неговиот „перформанс“, но воедно јавноста и беше поделена за тоа дали она за што раскажува Латас е или не е силување.

Социјалните мрежи буквално зовреа, видеото експлодираше од прегледи, а две компании веќе и ги повлекоа своите реклами од каналот на Лазаров.

Хелсиншкиот комитет со силна осуда. 

„Објавеното интервју од јутјуберот Лазаров, каде неговиот гостин Латас споделува дека тој и неколку другари на 15 годишна возраст злоставувале девојка е колективен, општествен пораз и реален приказ за тоа како ги третираме жените жртви на насилство.“, напишаа оттаму.

Всушност повеќе невладини организации, јавни личности и корисници на социјалните мрежи побараа државни органи да реагираат во врска со изјавите на новинарот и водител Драган Павловиќ – Латас дадени во поткаст за јутјуберот Стефан Лазаров, за кој тие сметаат дека содржи промоција на насилство врз жените, како и признание од Латас дека на 14-годишна возраст извршил силување на девојка.

Во интервјуто Латас раскажува како изгубил невиност на 14-години откако некој негов повозрасен другар му дозволил да има однос со неговата девојка во „фиќо“, откако тој претходно „завршил работа“. Претходно Латас раскажа дека тој негов пријател бил насилен кон девојките.

Се огласи Латас со објаснување дека не станува збор за силување и промоција на насилство, туку за обид за негова стигматизација.

Со став излезе и форумот на жени на СДСМ. 

„Најостро го осудуваме однесувањето на новинарот Латас и јутуберот Лазаров кон жената во општеството. Јавното промовирање и поддржување на сексуалното насилство и сексуалната злоупотреба е целосно неприфатливо и мора да подлежи на сакционирање. Ваквото понижувачко, омаловажувачко, деградирачко третирање на жената мора да биде осудено од сите општествени чинители, и да се испрати јасна порака дека насилството врз жените е неприфатливо. Ги повикуваме институции во рамките на своите на надлежности да превземат мерки за санкционирање. Го повикуваме јавното обвинителство согласно нивните законски овластувања да покрене постапка за утврдување на евентуална кривична одговорност. Ги повикуваме новинарските здруженија, Советот за етика во медиуми да го осудат ваквото однесување и да го санкционираат новинарот Латас. Форумот на жени на СДСМ смета дека секој облик на насилство врз жените е флагрантно кршење на човековите права и затоа бараме веднаш затворање на youtube каналот. Воедно ги повикуваме сите граѓани и граѓанки да ни се придружат во оваа иницијатива и да побараат затворање на овој канал“, велат од Форумот на жени на СДСМ. .

Компанијата Кожувчанка, кој производ е и популарниот Синалко, а чие лого е истакнато кај јутјуберот Стефан Лазаров, бара тој да го тргне истото и информира дека не поддржува емисии во кои се промовира таков говор, каков што беше случајот со емисијата во која гостуваше новинарот Драган Павловиќ – Латас.

На социјалните мрежи и вчера и доцна вечерта не стивнаа реакциите.

Работите ќе станат појасни во текот на денешниот ден, кога се очекува надлежните органи и институции да се произнесат за изнесенето во интервјуто.