Македонски телеком ги намалува цените за националните фиксни повици

Добивај вести на Viber

Македонски Телеком од 1 март ќе ги намали цените за меѓумесни повици кон сите фиксни оператори. Цената за локалните и меѓумесните повици ќе биде изедначена и наместо досегашните 3,54 денари за повици на национално ниво во нормална тарифа и 1,77 во евтина, корисниците ќе плаќаат 1,18 денари во нормална и 0,71 денар во евтина тарифа. Со ова, цената на меѓумесните ќе се изедначи со цената за локални повици, информираат од компанијата. Намалувањето на цените било овозможено со инвестицијата на Македонски Телеком во новата, модерна платформа базирана на Интернет протокол, на која беа мигрирани сите корисници. Сега, откако сите стари централи се исклучени, повиците ќе се рутираат само од една централна точка. „Веќе нема да постои разлика меѓу локалните и меѓумесните повици, сите повици во Македонија ќе бидат национални и ќе имаат иста цена кон сите фиксни оператори. Новите цени ќе важат за сите тарифни модели, освен за специјалните понуди“, информираат од Телекомот. Истовремено, намалени се и цените на повиците од фиксни кон мобилни телефони до 30% и тоа за повици кон сите мобилни оператори. Намалувањето се однесува на сите тарифни модели и пакети на услуги за приватни и деловни корисници.