МАКЕДОНСКИОТ НОВИНАР КОЈ УСПЕА ДА НАПРАВИ ИНТЕРВЈУ СО ВИВИЕН ВЕСТВУД: Толески од групацијата Фактор изненаден од контроверзната дама

Добивај вести на Viber

Светски познатата дизајнерка Вивиен Вествуд почина вчера на 81-годишна возраст, а веста ја потврди нејзината модна куќа, истакнувајќи дека таа починала мирно и опкружена со семејството во нејзиниот дом во Лондон.

За време на повеќедецениската кариера на Вествуд, таа ја дефинираше британската мода со нејзиниот ексцентричен дизајн, стил и еколошки активизам, поради што наидуваше на критики во јавноста зошто во насока да се штеди водата таа се капела само еднаш неделно, додека нејзиниот сопруг еднаш месечно.

Во плејадата интервјуа кои легендарната контроверзна дама ги даде за светски познати списанија и ТВ емисии, со неа успеа да направи интервју и Небојша Толески, актуелен уредник на Женски и на Машки Магазин од групацијата Фактор.  

-Интервјуто со Вествуд беше направено во Фиренца во 2008 година. Имаше предавање пред студентите на една модна академија. Јас бев единствениот новинар тогаш кој успеа да допре до неа, иако на почетокот не сакаше воопшто интервју. Остроумна во одговорите, каприциозна во однесувањето и без влакна на јазик. Носеше фустан кој не беше порабен, па ја прашав зошто е тоа така? „Затоа што така треба“- дрско ми рече. А, кога и кажав дека сум од Македонија, сосема се изненадив од нејзиниот одговор... - Македонија??? А, па тоа е Северна Грција, Македонија како таква не постои!“

Вествуд остава длабок печат во светот на модата, а како пто наведува Толески во неговиот пост на Фејсбук, таа засекогаш ќе остане една од најдобрите светски модни дизајнерки, вечно бунтовна, инспиративна, своја и дива.