МАРЕС Конференција 2024: Неопходна тесна соработка меѓу јавниот и приватниот сектор за успешна енергетска транзиција

Добивај вести на Viber

Вчера во хотелот „DoubleTree by Hilton“ се одржа втората конференција на МАРЕС (Македонска асоцијација за обновливи извори на енергија), која собра водечки експерти, претставници од институциите и инвеститорите за да дискутираат за иднината на обновливите извори на енергија и енергетската транзиција во Северна Македонија.

Конференцијата започна со поздравни зборови од Слободан Поповски, претседател на МАРЕС, кој нагласи дека „Oбновливите извори на енергија се суштински за иднината на нашата земја и за регионалната енергетска стабилност.“ Во своето отворање, Изет Меџити, заменик претседател на Владата и министер за животна средина и просторно планирање, подвлече дека „Зелената агенда е клучна за иднината на Западен Балкан.“

Овој настан беше поддржан од Германското друштво за меѓународна соработка (GIZ), Европската банка за обнова и развој (EBRD), НЛБ Банка како и Шпаркасе Банка кои ја потврдија својата заложба за развој на зелени проекти и одржлив развој во регионот.

Главни панели и говорници

Првата сесија, под наслов „Стратешки преглед за имплементација наОИЕ,“ беше модерирана од Дена Крстеска од правниот комитет на МАРЕС. Главните говорници вклучуваа експерти како Самоил Целески, Марко Бислимоски од Регулаторната енергетска комисија, и претставници од МЕПСО и Министерството за енергетика, кои дискутираа за стратегиите до 2040 година и предизвиците за енергетска ефикасност и интеграција на обновливите извори.

Вториот панел се фокусираше на пазарните механизми и финансиските модели потребни за забрзување на обновливите извори. Јоханес Хенкел од 50 Hertz ги сподели искуствата од Германија, истакнувајќи ја важноста на стабилноста и транспарентноста во финансиската поддршка на проекти од обновливи извори. Претставници од НЛБ и Шпаркасе Банка ги нагласија нивните заложби за финансиска поддршка во зелени проекти во Македонија.

Во текот на панелот „Предизвици и решенија за енергетската транзиција,“ кој го модерираше Ирина Аврамска Пашовска, претставници од ЕБРД, МАРЕС, и други организации дискутираа за улогата на новото Министерство за енергетика во забрзување на декарбонизацијата и поддршка на климатските активности на земјата.

Последниот панел беше посветен на складирањето енергија и инфраструктурата, каде експерти од ЕВН, МЕПСО и други компании разговараа за потребата од надградба на мрежата и адаптација на правната рамка за поддршка на овие капацитети.

Клучни заклучоци

Конференцијата заклучи дека е неопходна тесна соработка меѓу јавниот и приватниот сектор за успешна енергетска транзиција. МАРЕС и партнерите ги поттикнаа сите засегнати страни да вложат во долгорочни решенија и иновации кои ќе ја зајакнат енергетската независност на земјата. Учесниците изразија подготвеност за продолжување на соработката и поддршка за реализација на стратегиите за зелена енергија.