Маричиќ: Владата е подготвена да ѝ даде на ВМРО-ДПМНЕ да ги формулира амандманите за Бугарите во Уставот

Добивај вести на Viber

Вицепремиерот за европски прашања Бојан Маричиќ во гостувањето во емисијата „Топ тема“ на Телма ТВ вечерва изјави дека Владата е подготвена да ѝ даде на ВМРО-ДПМНЕ да ги формулира амандманите за вметнување на Бугарите во Уставот. 

Вели дека ако ја пропуштиме шансата за ЕУ годинава, тогаш ќе влеземе во групата со Босна и Херцеговина и Косово. За таа цел, тој најави дека до крајот на 2023 многу официјални лица од ЕУ и пошироко ќе ја посетат Македонија за да им го пренесат тоа на нашите политичари. Идејата, како што кажа тој, е до крајот на годината да се отвори првиот кластер, па затоа е потребно да ги завршиме уставните измени и скринингот. 

„Во наредните денови ќе објавиме кои имиња ќе ги поканиме во експертската група за уставните измени. Ќе испратиме и писма до сите политички партии во Собранието да номинираат експерти или личности на кои им веруваат да бидат во таа комисија. Сакаме да покажеме дека нема што да криеме и дека нема тајни клаузули“, рече тој. 

Премиерот Димитар Ковачевски вели дека никого нема да убедува и разубедува за уставните измени, затоа што сите треба да веруваат во уставните измени. 

Лидерот на ВМРО-ДПМНЕ, Христијан Мицкоски за време на викендов изјави дека уставни измени под бугарски дикатат нема да има. Потребно е внесување на Бугарите во Уставот за Македонија да продолжи по европскиот пат.