Мартинката – нематеријално светско културно наследство?

Добивај вести на Viber

По повод 'Среќна Баба Марта' и почетокот на месец март , ХАЕМУС - центарот за научно истражување и промоција на културата од Скопје, како и секоја година и оваа година го прослави доаѓањето на пролетта и древната традиција на изработката, дарување и носење на мартинки. Настанот беше проследен со огромен интерес од страна на посетителите, над 300 мартинки беа разделени за помалку од два часа, мајки, баби, дедовци и татковци заедно со своите најблиски уште во 11 часот започнаа да го посетуваат City Kids Club (детскиот клуб во Скопје Сити Мол) и им врзуваа мартинки на своите најмили. Изработката и подарувањето мартинки на најблиските е традиција која во Република Македонија се почитува со стотици години. На овој ден карактеристични црвени и бели висулци, топчиња и исплетени бразлетни познати како мартинки се разменуваат или се поклонуваат на најблиските, и се носат закачени на облеката или врзани од зглобот на раката. Генерално, таа секогаш е со конци од црвена и бела боја меѓусебно испреплетени или исплетени, од кои црвената ја симболизира боја на крвта, а белата на чистотата. Се подарува на 1-ви Март во чест на Баба Марта и се носи околу рака или закачена на облеката се додека расцвета првото дрво. Потоа се закачува на него со желби за сопственото и за добро здравје на своите блиски во тековната година. ХАЕМУС ги почитува мартинките како нематеријално културно наследство и ги негува во духот на традицијата, во сите облици и начини кои би придонеле за нивната поширока промоција. Оваа година настанот под мотото 'Подарете им мартинка за среќа на најблиските' го организираше УНЕСКО клубот ХАЕМУС, во соработка со Скопје Сити Мол, Управата за заштита на културното наследство на Република Македонија и Институтот за фолклор ,,Марко Цепенков, а се направи како поддршка за мултинационалната апликација до УНЕСКО, во која учествува и Македонија, заедно со Романија, Бугарија и Молдавија. Целта е заштита на мартинките како нематеријално светско културно наследство.