МЕПСО: Снема струја поради висок напон кој доведе до испад на трансформаторите

Добивај вести на Viber

МЕПСО објави дека во раните утрински часови дошло до дефект и краткотраен испад на 110 киловолтната преносна мрежа поради што во половина Македонија снема електрична енергија.

Од таму велат дека причина за овој прекин се високите напони на 400 киловолтната мрежа во целиот регион, што го афектирале нашиот систем и го предизвикале краткотрајниот испад на енергетските трансформатори 400 /110 киловолти во трансформаторски станици.

- Станува збор за регионален и европски проблем со кои се соочуваат речиси сите преносни систем оператори поради нискиот транзит и конзум на електрична енергија во текот на ноќните часови и викендите во овој период од годината. Од настанување на испадот, екипите на АД МЕПСО експресно реагираа и за околу еден час по прекинот, нормализирано е напојувањето со електрична енергија во државата, соопшти АД МЕПСО.

Оттаму информираат дека нивните екипи продолжуваат да работат на целосно нормализирање на стабилноста на електроенергетскиот систем.

-Дополнително, вреди да се истакне дека систематично преку реализација на новите инвестиции во тесна соработка со соседните преносни систем оператори, се придонесува за зајакнување на стабилноста на системот, кој во минатото беше сериозно запоставен и неадекватно одржуван. АД МЕПСО и понатаму будно ја следи состојбата и се врши координација со преносните системи во регионот со цел да се обезбеди стабилност во системот и безбедност на корисниците со напојување со електрична енергија, посочуваат од АД МЕПСО.